Advertisements

Proyekto pa hóbennan bira piskadó ta hañando forma

Proyekto pa hóbennan bira piskadó ta hañando forma

Geplaatst op 12 Mart 2019 dor di Ministerio di Desaroyo Sosial, Labor i Bienestar


Willemstad – Den luna di desèmber 2018, Ministerio di Desaroyo Sosial, Labor i Bienestar (SOAW), huntu ku Ministerio di Enseñansa, Siensia, Kultura & Deporte (OWCS), Ministerio di Salubridat Públiko, Medio Ambiente & Naturalesa (GMN) i Stichting Landbouw, Veeteelt en Visserij (SLVV) a kuminsá un kurso pa asistente di piskadó profeshonal.

E proyekto
Propósito di e proyekto ta pa brinda hóbennan perspektiva den merkado di peska i asina logra baha desempleo bou di hubentut. E hóben, ku terminá e proyekto ku hopi éksito, lo por traha komo piskadó, traha den sektor marítimo òf sigui kursonan na nivel di SBO.

Grupo di hóben
E gruponan di hóben ku a keda aserká pa forma parti di e proyekto aki ta hóbennan famia di piskadó, hóbennan ku no a terminá un òf mas estudio, hóbennan sin kualifikashon, èks detenidonan i hóbennan sin eksperiensia laboral.

Progreso di e proyekto
Na inísio SOAW a buska e kantidat di hóbennan pa e proyekto aki i a hasi varios entrevista ku tur posibel kandidato. Te ku awor e hóbennan a risibí lès di siña snorkel i nan a risibí sertifikashon di higiena di SLVV. Nan a haña natashon di OWCS i kurso di EHBO di GGD/GMN. E hóbenan ta risibiendo un kompensashon chikí di SOAW.

Mas despues nan lo risibí kursonan tokante drechamentu di boto i métodonan di komunikashon riba laman. Di komienso te final e hóbenan ta risibí formashon personal di sr. Marcel Pinedo. Ta spera ku na fin di 2019 e hóbenan ku finalisá e proyekto ku éksito lo risibí sertifikado di Piskadó Asistente.

Trahando na De Visserij
Banda di e kursonan menshoná, e hóbennan ta trahando kaba na De Visserij Piskadera pa ehersé e parti práktiko di lokual nan a siña. Tur partner envolví ta spera ku huntu lo logra (re)introdusí mas hóben na merkadonan laboral ku ta rekerí trahadó.

Advertisements
error: Content is protected !!
%d bloggers like this: