Advertisements

Tres Komishon di Parlatino lo tene nan reunion na Kòrsou

Tres Komishon di Parlatino lo tene nan reunion na Kòrsou

 

Djaweps dia 14 i djabièrnè dia 15 di mart 2019 próksimo Kòrsou lo ta esenario i anfitrion di tres (3) komishon figo di e Parlamento di Latino Amérika i Karibe “Parlatino”. E reunion di Parlatino aki lo konta ku delegashonnan di paisnan manera Aruba, Argentina, Bolivia, Brazil,  Chile, Costa Rica, Cuba, Ecuador, Mexico, Panamá, Paraguay i Uruguay. Un tim dje sekretariado di e ofisina prinsipal di Parlatino na e suidat kapital Panamá City di Panamá tambe lo ta presente ku huntu ku e staf i personal di Grefi di Parlamento di Kòrsou lo kordiná i asesorá e delegashonnan durante nan reunion aki.

E Komishon figo ku ta atendé asuntu di “Energia i Mina” tin riba su agènda e tópiko “E desafionan Energétiko ku Paisnan den Karibe ta konfrontando”  i nan lo hiba deliberashonnan final riba e proyekto di e resolushon di Parlatino tokante Integrashon Energétiko den Karibe. Tambe nan lo trata e tópiko “Fracking” ku ta e proseso usando preshon haltu pa gas i petroli for dje supsuela.  Ademas nan lo deliberá riba e tema di eksplotashon di minanan na un manera sostenibel.

E komishon figo di Medio Ambiente i Turismo lo trata un Lei Modelo riba kontaminashon di awa i un Lei Modelo riba turismo komunitario.

E komishon di “Salud” lo sigui ku trabounan riba un Lei Modelo riba aksesibilidat di medisinanan I estudionan di kosto haltu den paisnan den e region Latino i Karibe. Tambe lo trata e tema di enbehesimentu i e tema di enfermedatnan ku ta afekta e region.

Ta tradishon ku durante e tipo di enkuentronan internashonal asina’ki ku e pais anfitrion, sede di e reunion dje komishonnan figo di Parlatino, riba petishon dje komishonnan mes ta organisá bishitanan di trabou pa un òf mas instansia, kompania òf instituto ku tin un ròl klave den un òf otro sektor òf industria ku ta relatá na e tema di momentu di nan reunion. Den e kaso aki otro siman e delegashonnan di Parlatino lo realisá un bishita na Aqualectra i Carmabi.

Parlatino a ser fundá 10 di dezèmber 1964 despues ku a lansa e “deklarashon di Lima” aya na Lima Perú. Kòrsou komo parti di Antia Ulandes e tempu ei i awe komo pais outónomo den Reino Ulandes, for di e momentu ku a funda e órgano Parlatino ta miembro i a asistí i organisá vários reunion di Parlatino na nivel haltu. E ultimo bes ku esaki a sosodé aki na Kòrsou tabata na aña 2012.
Un yu di Kòrsou, den persona di sr. Richardo Elhage (q.e.p.d) a okupá e puesto di mas haltu den e órgano regional aki esta esun di Presidente di Parlatino di 17 di febrüari 1975 te ku 25 di aprel 1977. 

Advertisements
error: Content is protected !!
%d bloggers like this: