Advertisements

Parlamentario Curtley Obispo: Kòrsou ta un demokrasia ku órden a base di nos Areglo di Estado di Kòrsou.

Kòrsou ta un demokrasia ku órden a base di nos Areglo di Estado di Kòrsou.

Den e reunion di parlamento di Kòrsou di dia 7 mart 2019 parlamentario Curtley Obispo a bolbe mustra riba un punto importante pa ku gobernashon di nos Pais Kòrsou. E la trese dilanti ku: “pa nos demokrasia, ku tantu nos ta apresiá, por sigui krese, ta sostenibel, ta profundo, edukashon ta krusial pa loke ta trata kon nos sistema di gobernashon di nos Pais Kòrsou ta hinka den otro. Pues un poblashon eduká, iluminá i bon informá ta un di e formanan mas sigur pa sigui promové salu di nos demokrasia aki na Kòrsou. Awe nos tin un Areglo di Estado di Kòrsou danki na entre otro: (a) nos Pueblo di Kòrsou ku a aprobá esaki, (b) fundadornan di nos Pais Kòrsou ku a kana i guia e trayekto estatal largu pa yega na Pais Kòrsou (c) fundadornan ku a vota pro den Konseho Insular di Kòrsou riba 7 sèptèmber 2010. A base di esaki e último Gobièrnu di Teritorio Insular di Kòrsou a firma huntu ku tur e otro 7 Gobièrnunan den Reino Hulandes di e tempu ei durante e Konferensha di Mesa Rondó di 9 sèptèmber 2010. Pa asina Kòrsou bira un pais outónomo den Reino Hulandes entrante 10 òktober 2010.

For di 10 òktober 2010 Kòrsou tin su sistema di gobernashon demokrátiko kual ta wòrdu preskribí dor di nos lei máksimo: nos Areglo di Estado di Kòrsou. Den e órden demokrátiko aki nos kada unu tin ku sigui duna di nos parti  pa nos Pais Kòrsou prosperá ku viktoria ku trabou. Parlamentario Curtley Obispo a bolbe mustra riba e fundeshi sólido di nos estado demokrátiko kual ta skibi den entre otro e preámbulo (e introdukshon) di nos Areglo di Estado di Kòrsou i a sita: “Derecho di outodeterminashon di Pueblo di Kòrsou ta apsoluto i inalienabel. Pueblo tin e último palabra na momento di ehersé e derecho sagrado aki. Pueblo a skohe den tur libertat pa un País Kòrsou outónomo den Reino Hulandes ku un konstitushon propio: e Areglo di Estado di Kòrsou. Kòrsou komo pais outónomo mes ta atendé tur su propio asuntunan. Den nos Estado di derecho demokrátiko ta garantisá i respetá derechonan fundamental. Hustisia ta nos derecho mas haltu. Nos Gobièrnu, nos Parlamento i nos Poder Hudisial ta e fundamentunan pa un desaroyo duradero positivo di nos Pais Kòrsou. Ku nos fe den Dios nos lo disfrutá di su protekshon, pasombra bendishoná ta e pueblo ku tin Señor komo su Dios. Nos lo uni forsa i lo sirbi no Pais Kòrsou ku amor den igualdat i pas”.

 

Advertisements
error: Content is protected !!
%d bloggers like this: