Advertisements

Desvelo potrèt di promé hende muhé ku a bira miembro di Parlamento

Desvelo potrèt di promé hende muhé ku a bira miembro di Parlamento

Djabièrnè di 8 di mart 2019 den lobi di Parlamento di Kòrsou situá den Breedestraat Punda a tuma lugá un seremonia simpel pero ku un konotashon históriko grandi pa nos Pais. 8 di mart ta dia internashonal di hende muhé, un dia ku rònt  mundu ta duna atenshon homenahe na e ròl importante ku hende muhénan tin den komunidat komo yu mama i profeshonal sirbiendo e pais kaminda nan a nanse. Pa nos komunidat e dia 8 di mart 2019 ta e fecha dje momentu ku a desvelá e potrèt dje promé hende muhé ku a drenta Parlamento i fungi komo Parlamentario den e órgano di mas haltu di nos pais. Angela Altagracia”Tata” de Lannoy-Willems (1913-1983) tabata un dje pioneronan importante ku a hiba un lucha largu pa hende muhénan di nos pais  por tin e derechi di voto durante un elekshon. Djaweps dia 17 di mart 1949 nos hende muhénan pa promé biaha den nos historia polítiko a hasi uso di nan derechi sagrado di bai urna elektoral pa asina vota i skohe nan representantenan manera nos leinan ta elektoral preskribí. E promé elekshon ku a tene na Kòrsou a tuma lugá dia 20 di desèmber 1937 e tempu ei ta solamente hende hòmber di 23 aña i mas bieu, ku ta paga belasting, i ta tin propiedat na nan nòmber ku un formashon eskolar di mínimo loke ántes nan ta yama zesde klas ku awendia ta nan ta yama grupo 8. Kolektamentu di firma 1013, mandamentu di karta di petishon pa e di dos kámara di Parlamento Hulandes (Tweedekamer) i sosten di vários suidadano patriota a kulminá den e introdukshon dia 17 di mart e lei di voto general aki na Kòrsou. E potrèt di sra. Angela Altagracia “Tata” de Lannoy-Willems ta bai forma parti di e galeria di e ilustre sirbidónan ku den nan tempu sea ku nan lucha òf ponensia a marka historia i a kondusí ku awe nos tin e demokrasia Parlamentario aktual. Personan manera sr. Genereux Jacob Richard de Lima, sr. Abraham Mendez Chumaciero, sr.  Moises Frumencio Da Costa Gomez, sr. Efraim Jonckheer, sr. John Horris Sprokel, sr. Modesto “ Chano” Margaretha tur baluartenan di nos historia polítiko.

 

 

Advertisements
error: Content is protected !!
%d bloggers like this: