Advertisements

Kiko e Pueblo ke, kiko e Masa ke Liderazgo Patriota òf Anti-Patriota?

Kiko e Pueblo ke, kiko e Masa ke Liderazgo Patriota òf Anti-Patriota?

 

Siman ku a pasa ta 3 luna ku nos lider ta sera, su abogadonan ta bishit’é ku frekuensia i e ta kompartí su pensamentunan ku nan. Esaki ta su pensamentu polítiko riba tur lokual ta pasando na Kòrsou awe.

 

Lamentablemente nos tin ku biba ku e eskoho di nos pueblo, nos ta haña e Gobièrnu ku pueblo a duna sufisiente asiento pa nan por forma un mayoria. Kresementu ekonómiko negativo aña tras di otro, for di 2013 bin ariba. Na lugá di hasi Kòrsou atraktivo pa e “Boom Ekonómiko” nos a hasié mas kompliká i no interesante pa biba i pa invershonistanan.

 

Mester hasi Kòrsou interesante pa invertí, mester hasi Kòrsou interesante pa biba, kon bo ta logra hasi esaki?

 

Ku un sistema simpel, klaridat den tur responsabilidat di e pueblo na Gobièrnu. Anto Gobièrnu tin ku kumpli ku mesun reglanan ku tin pa e persona meskos tin pa Gobièrnu kumplí.

 

Problema;

Tiki hende i tiki forsa di kompra, tiki hende ku ta kontribuí na kaha di gobiernu loke ta trese hopi problema ku fondonan di salubridat, meskos tiki hende hopi problema ku fondo di AOV.

 

Solushon;

Mas hende i un pais ku tur su reglanan transparente i bon propaganda lo generá interes pa mas hende bin biba i invertí na Kòrsou. Kiko nos tin ku kumpli kuné, un sistema di impuesto simpel pa abo komo persona, un sistema di impuesto simpel pa e komersiante/invershonista.

 

Resultado;

Forsa di kompra ta subi tur dia, ku re-imigrashon di nos hendenan i mas otro hende, interes pa biba den un pais ku reglanan ta simplifiká, kaminda ta papia 4 idioma, ta biba ku distansia kòrtiku dunando mayornan oportunidat di ta envolví den desaroyo di nan yunan di serka kontrali na paisnan ku distansianan grandi i largu, ta sierto di e faktornan aki di nos Kòrsou ta trese bentaha pa por krese i resolvé nos kresementu ekonómiko positivo.

 

Un fluho di oumento di abitantenan lo trese mas hende pa aportá na fondonan di salubridat i fondo di AOV, sigur ora esakinan ta di edat entre 25 pa 48 aña di edat, lo tin mas hende pa kumpra for di e komersio ku tin hopi servisio i produkto pa ofresé pero no tin merkado pa bende na e momentunan aki.

 

 

E akshon ta simpel un lider Patriota skohe dor di pueblo na mando i ku kurashi pa simplifiká su pais, eksponiendo nos virtutnan ku ta hasi e isla chikí aki den Karibe asina potente ku promé ku nos mes sa, nos ta un komunidat di 350 mil abitante ku si por karga ku su karga finansiero den un ekonomia próspero.

 

Mas hende mas nesesidat di kas, mas apartamentu, mas outo, mas konsumo for di supermerkadonan i toko, mas konsumo for di tur negoshi na Kòrsou. Mas di tur esaki ta generá kupo di trabou paso tur negoshi lo ta den kresementu.

 

Pero si nos siguí duna partidonan derechista anti-patritiotiko sosten manera a tuma lugá na 1999, ku e siguiente resultadonan aki;

 

PAR, MAN i PNP na 1999 tabata siguí òrdu di Hulanda i IMF i nan a bin e tempu ei, ku idea di un “Herstel Programma”, ku tabatin komo resultado ku 43 mil hende a bai for di Kòrsou den añanan 2000, 2001 i 2002. Míles di negoshi a sera, a retirá 2 mil empleado públiko, a “Crash” nos ekonomia. ALM a sera, debe nashonal a krese i yega na sumanan impagabel, porsentahe di desempleo a subi drástikamente, a kita e belasting yama e tempu ei ABB i introdusí un belasting nobo ku e nòmber di OB (Omzetbelasting).

 

E pregunta ku ami kier hasi pueblo ta si nos siguí laga e kombinashon aki Goberná pa 10 òf 20 aña kiko lo kambia pa futuro?

 

Ata nos dor di 29 di mei 2017, atrobe ku partido PAR, MAN i PIN sinta komo Gobièrnu

 

2017-2019;

  • Awe e plan ku tin yama “Urgentie Programma” i no “Herstel Programma”
  • Awe no tin IMF manera na 1999 awor nos konosé CFT
  • Gabinete Kok 2 yama Gabinete Rutte 3, mesun VVD dunando instrukshon meskos ku na 1999
  • E plan awor ta pa kita OB di 6% i 9% i introdusí ABB (Algemene bestedingsbelasting) bek di 1999 pa mas di 20% kontra pueblo

 

Kiko a keda meskos ku na aña 1999, míles di hende a pèrdè trabou, masha hopi negoshi a sera nan porta, míles di personanan a imigrá pa otro pais atrobe, nos debe nashonal ta yegando sifranan impagabel atrobe, ekonomia ta di “Crash” atrobe dor di PAR,MAN i PIN. Défisitnan impagabel atrobe, seri di medidanan na kaminda atrobe, 800 empleado públiko lo bai kas di un manera òf otro atrobe, na lugá ku ALM bai fayit awor ta InselAir a bai fayit lagando 1200 kompania lokal ku debenan serka nan di mas 100 mion florin, lagando 50 mion di debe na Ontvanger i rankando 35.7 mion florin di Pueblo i Postspaarbank ku tabata destiná pa nos sosiedat i no Insel Air su akshonistanan.

 

Ken su falta?

E falta ta di nos mes, nos no ta rekonosé e Patriota for di e anti-patriota. E anti-patriota no ta import’é kua Dios e sirbí, basta ku e Goberná i opviamente hasiendo lokual Den Haag demanda.

 

Próksimo elekshon na 2019, 2020 òf 2021, Pueblo mester hala un liña entre e Lider Patriota i esun anti-patriota.

 

 

Tin partido ku no lo kambia nunka, ni maske kua lider nobo nan haña, e partido ta lanta ku su propósito i nan meta no ta kambia. Pero e poder ta den e masa i si e masa ta patriota na su propio bandera i nòmber di su pais Kòrsou, e influensia di afó no por gana nunka nos mes ku ke progreso den nos futuro!

 

E pos ku nan ta kobando pa nos, nos por sali afó pero e ta tuma nos mes su esfuerso pa logra esaki, nos ku ta stima nos pais i ta destiná pa biba riba dje den bon i den malu, ta nos so por generá konfiansa pa nos i nos futuro generashon nan. P’esei lanta, ban stòp di biba e soño di ta mediokre, stòp di ta konformista lanta ariba. Oportunidat no ta bin su so, mester sali i busk’é.

 

Viktoria ta e rekompensa di trabou. Tur dia ta un paginá blanku buta, pa nos skibi un historia nobo, lanta Kòrsou! (Proverbio 6:9)

 

Gerrit Fransisco Schotte

Sentro di Detenshon i Korekshon Kòrsou

Lider di Movementu Futuro Kòrsou

 

 

 

Advertisements
error: Content is protected !!
%d bloggers like this: