Advertisements

65 aña di emisora radio Hoyer.

65 aña di emisora radio Hoyer.

Dia 10 di mart komunidat di Kòrsou kompletu mester ta di fiesta ku e di 65 aniversario di emisora radio Hoyer, e solo di pueblo. Si bai bèk den historia nos kada un mester rekonosé ku radio Hoyer ta un di e fuentenan ku tabatin un impakto emansipatorio kasi inigualabel riba pueblo di Kòrsou. No ta fásil ekspresá den djis algun palabra e balor inmensamente grandi ku e radio-emisora aki (taba)tin pa nos pueblo. Radio Hoyer por ehèmpel ainda ta un di e radionan mas konfiabel pa loke ta notisia na Kòrsou, al kaso i semper korekto, ophetivo, papiando e bèrdat sin kamuflá, ni skohe banda. Esei sin duda ta debí na e kultura ku ta ankrá den e emisora aki i ku a sigui bai pasando over di generashon pa generashon. Promé den man di Don Horacio Hoyer q.e.p.d, kende tabata e fundador di e emisora aki, djei a pasa e maneho i batuta over pa su yu muhé Helen Hoyer i awendia Gwenny Visser ta na timon. Riba tereno di deporte, músika, ekspreshon di kultura, e emisora aki semper a kana padilanti i ta atendé i aktua inspirá pa sintimentu i nesesidatnan di pueblo. Ta na ekspertonan pa un dia para ketu i djis evaluá di un forma profundo kiko e radio-emisora aki a nifiká pa desaroyo di nos idioma papiamentu por ehèmpel. Remarkabel ta e hecho ku radio Hoyer a produsí un berdadero arsenal di programanan radial na un nivel di edukashon i formashon sumamente haltu i den tur esaki hopi biaha loke ta resaltá ta e toke krioyo, e manera di konsolidá i eksponé e identidat kurasoleño. No papia mes di e kantidat di personahenan (palankanan grandi) ku e radio-emisora aki a produsí i disponé di dje. Mas ku tur kos ta e espíritu bibu i inovativo ku kada biaha ta bini padilanti den e pasonan di radio Hoyer, tumá komo akshonnan nesesario pa radio sigui biba i sigui ta un medio responsabel i konfiabel den bista di pueblo. Radio Hoyer ta e promé emisora na Kòrsou ku a introdusí uzo di pènel solar den radiodifushon, un desishon ku otro biaha a aksentuá e mentalidat vishonario di e emisora aki. E radio aki ta ademas esun ku a hunga un papel importantísimo den grabashon i asina ei inmortalisá susesonan kultural i históriko di nos pasado glorioso. Radio por lo general te ainda ta e fuente ku mas alkanse den mundu. E ta skuchabel den Kòrsou, sea na kas, den outo, na ofisina, na playa i awendia danki na Internèt hasta pafó di nos fronteranan. Selebrashon di 65 aniversario di radio Hoyer no ta sufisiente si ta djis pa nos ta huntu ku otro den momentonan di alegria i plaser, radio Hoyer en realidat tin un aporte grandi den progreso i adelanto mental i spiritual di nos pueblo. Konsentrando riba kalidat, anto poniendo su eksigensianan haltu, e radio aki a sirbi komo modelo pa otro medionan. Tabata masha na su lugá ku a kombertí plechi kaminda e radio aki ta situá den Plaza Horacio Hoyer, pero ta e momento pa laga un grupo di ingeniero i arkitekto sinta huntu i diseñá algu un poko mas spesial pa e área aki pa honra e radio-emisora ei, su dirigentenan i aksentuá loke el a nifiká pa Kòrsou. Plaza Horacio Hoyer no mester djis karga e nòmber di Don Horacio Hoyer, sino e mester ta e refleho di un piesa di inspirashon i orguyo pa e komunidat di Kòrsou. Mester ta posibel krea na e sitio ei un museo ku ta duna un bista amplio di desaroyonan den komunikashon, inkluyendo avansenan riba tereno di radio. Mester ta posibel laga un di e edifisionan okupá aktualmente pa servisionan di gobièrnu bira e museo. Plaza Horacio Hoyer, rumannan mester bira un área sumamente spesial na Kòrsou i esei ta posibel si di bèrdat sinta pensa i deliniá un propósito firme pe sitio. Alkansá e di 65 aniversario enbèrdat ta un logro sigur si tuma na konsiderashon prinsipalmente e esfuersonan pa mantené un kontakto i komunikashon real ku pueblo, e perseveransia lo mester tabata inmenso pa por a keda riba pia. Pabien di antemano na Helen Hoyer, su yu muhé Gwenny i tur e orguyonan di radio Hoyer, e solo di pueblo.

 

Erwin Raphaëla     

Advertisements
error: Content is protected !!
%d bloggers like this: