Advertisements

Walroud (PAR): Semper lo tin hende ku gana di mancha e gobièrnu aki Henter gabinete Rhuggenaath ta traha trabou sushi di limpiesa

Walroud (PAR): Semper lo tin hende ku gana di mancha e gobièrnu aki
Henter gabinete Rhuggenaath ta traha trabou sushi di limpiesa

 

E dianan aki nos a tuma nota di un diskushon ku a lanta kabes ku ta drai rondó di un ekspreshon ku sr. Clift Christiaan a hasi den un reunion no-ofisial ku un grupo di lidernan sindikal ligá ku nos refineria. Aki sr. Christiaan lo a deklará “ku e ta traha trabou sushi pa promé minister Eugene Rhuggenaath”.

For di ora e sindikatonan sin ningun splikashon aklaratorio a hisa benta e ekspreshon aki riba mesa i lag’e bai biba su bida, tabata di ferwagt ku oposishon lo a bai kue netamente e ekspreshon aki pa hasi poko polítika barata kuné den e búskeda ferviente i eterno pa purba mancha nòmber di gabinete Rhuggenaath en general i promé minister Rhuggenaath en partikular.

Ta bon pa splika ku for di dia ku gabinete Rhuggenaath a sinta na 29 di mei 2017, ta tur minister, tur ministerio, tur kompanianan i fundashonnan di gobièrnu i tur otro hende ku di un manera òf otro ta enbolbí den gobernashon di nos pais, ta hasiendo trabou sushi di limpiesa. E trabou sushi di limpiesa ta e trabou unda e gobièrnu aktual tin ku drecha, ruim op, pone règt i solushoná tur sorto di porkeria ku gobièrnunan di turno a bai laga for di 101010 bin ariba. Trabou sushi di limpiesa ta nada mas i nada ménos ku limpia stupi di pais ku otronan a bai laga den mal estado i tin biaha den un desòrdu kompleto pió ku landfill. Anto e trabou sushi di limpiesa aki tin ku pasa bou di preshon di tempu, bou di sirkunstansianan difísil i kompliká i pa kolmo bou di atakanan estilo di ‘fake news’ tresé pa forsanan polítiko. Trabou sushi di limpia porkeria no ta nada agradabel pa esun ku tin ku hasié. Sigur no ora ta trata di kos ku bo mes no a kousa pero si ku bo tin ku bai drecha promé ku tur kos. Hasi trabou sushi di limpiesa tin biaha ta frustrante ku por pone asta e profeshonal di mas vèrsá sali for di su for di su ‘skil’.

Mi ta kere ku loke sr. Christiaan tabata kier men ku “trabou sushi pa promé minister” ta e trabou sushi di limpiesa ku sr. Christiaan den su promé lunanan di trabou mester a bai hasi unda sr. Christiaan mester a sòru pa kita Guandong Zhenrong for di lomba di Kòrsou promé ku sr. Christiaan por a kuminsá ku su trabou mes di buska un partner stratégiko viabel pa nos refineria. Nada mas i nada ménos.

Pa finalisá lo siguiente. Ta hopi trabou sushi di limpiesa e gobièrnu aki a hasi i tin di hasi ainda. Ehèmpelnan de sobra: di Guandong Zhenrong te ku HNO, di enseñansa te ku nos aeropuerto i di problemanan ku nos refineria te ku e edifisio di SOAW. Ta na pueblo di Kòrsou pa mira, komprendé i balorá e gran esfuerso ku e gobièrnu aki ta hasiendo i ta na pueblo di Kòrsou tambe pa bira lomba pa esnan ku ketu bai ta buska forma di mancha e prosesonan aki dor di kue sierto kos i hisa benta esakinan riba e gobièrnu aki estilo di fake news i laga esakinan bai biba nan bida.

Advertisements
error: Content is protected !!
%d bloggers like this: