Advertisements

GERENSIA DI REFINERIA DI KORSOU TA REORGANISA ORGANISASHON ENKARGA KU BUSKEDA PA PARTNER STRATEGIKO PA REFINERIA ISLA

GERENSIA DI REFINERIA DI KORSOU TA REORGANISA ORGANISASHON ENKARGA KU BUSKEDA PA PARTNER STRATEGIKO PA REFINERIA ISLA

Willemstad- 8 di februari 2019- Gerensia di Refineria di Kòrsou (RdK) a partisipá na Hunta di Komisario, akshonista i sindikatonan den akshon su desishon pa reorganisá PMO.  Desde awor e departamentu PMO den RdK, ku ta enkargá ku e tarea pa buska un operadó pa nos refineria despues di 2019, lo tin un struktura nobo. E organisashon PMO ta keda enkabesá pa komishon chikí di tres persona. E komishon aki lo asistí na tur reunion ku tersero den kuadro di e búskeda pa un partner stratégiko pa modernisá, manehá i operá nos refineria despues ku e kontrakt aktual ku PDVSA vense na fin di 2019. Sr. Clift Christiaan lo no forma parti di e komishon aki. Gerente di RdK Sr. Marcelino de Lannooy, pa aworakí, lo ta e úniko miembro apuntá den e komishon aki miéntras  lo apuntá e dos otro miembronan dentro di poko.

E komishon di tres aki, ku ta na kabes di PMO, lo keda sostené pa empleadonan di RdK kombiná ku ekspertonan ku RdK buska. Sr. Errol Cova lo keda un di e ekspertonan i lo hasi bon uso di su ekspertisio.  Meskos lo sigui hasi uso di e konosementu i eksperensia di Sr. Clift Christiaan riba tur otro asuntu pa kua RdK ta responsabel pe.

Ta bon pa enfatisá ku Gobièrnu di Kòrsou a apuntá RdK komo e entidat pa atendé ku e búskeda importante aki. Den esaki gobièrnu a duna un mandato kla na RdK pa hasi tur loke ta na su alkanse pa mantené e refineria habrí i mantené e kuponan di trabou pa nos yunan di tera ku ta laborá den e refineria.

Mas aleu mester informá ku Hunta di Komisario di Refineria di Kòrsou (RdK) a bai di akuerdo ku un proseso aselerá pa buska un partner stratégiko pa refineria di Kòrsou. Rápidamente ta establesiendo kontakto ku e kandidatonan ku tambe a keda preselektá komo potensial partner stratégiko pa nos refineria. Den e kompanianan tin inkluí PDVSA. Manera ta konosí PDVSA mes a duna di konosé ku nan ta deseá di keda manehá i operá e refineria despues di 2019. Lo hiba e proseso na un forma aselerá teniendo debido kuenta pa esaki kana konforme e reglanan ku a keda akordá pa hiba e proseso inisialmente.  

Na mes momentu RdK lo no deskartá i lo sondia tambe kandidatonan ku anteriormente tabata den e proseso i otro nan ku despues ku e proseso a sera a mustra interes.  Hunta di Komisario a duna instrukshon na Gerensia di RdK pa tin klaridat riba término korto tokante di e posibilidat pa yega na un akuerdo di entendimentu i seguidamente sigui pa negoshashon i finalisashon di proseso pa yega na un partner stratégiko na un forma eksitoso.

Pa RdK ta di sumo importansia pa hinka mas aun tur esfuerso i atenshon pa yega na akuerdonan inisial pa asina por sigui negoshá rumbo pa yega na e partner stratégiko ku lo mester enkargá su mes ku nos refineria despues ku e kontrakt aktual finalisá. E mandato di gobièrnu pa  mantené nos refineria habrí, pèrkurá pa su kontinuidat i garantisá kuponan di trabou ta keda komo e puntonan prinsipal den esaki.

 

Advertisements
error: Content is protected !!
%d bloggers like this: