Advertisements

Parlamentario Curtley Obispo: Konbenionan di koperashon entre e 4 paisnan outónomo den Reino Hulandes ta un kos bon!.

Konbenionan di koperashon entre e 4 paisnan outónomo den Reino Hulandes ta un kos bon!.

Segun Parlamentario Curtley Obispo: Statüt  di Reino Hulandes ta indiká den artíkulo 1 ku for di 10 di òktober 2010 te ku awe ku Reino Hulandes ta konsistí di 4 pais outónomo kual ta: Kòrsou, Aruba, Sint Maarten i Hulanda. Tambe artíkulo 36 sigur ta indiká i ta duna e posibilidatnan ku e 4 paisnan por duna otro asistensia mutuo, konsulta i koperashon. Parlamentario Curtley Obispo ta di opinion ku tambe pa medio di konbenionan di koperashon, e 4 paisnan den Reino Hulandes tin ku sigui eksplorá tur posibilidat den kuadro di asistensia mutuo, konsulta i koperashon ku otro.

E konbenio di asistensia tékniko firma riba 21 yanüari 2019 entre Kòrsou i Hulanda tin e meta pa sigui krea oportunidatnan nobo i resultadonan positivo pa nos pueblo di Kòrsou. Asistensia tékniko pa yuda Kòrsou sigui krese pa loke ta: (1) organisá e koherensia integral i tambe enfoke den implementashon di e Strategia di Kresementu pa Kòrsou, (2) sigui mehorá i fortifiká e funshonamentu di e organisashon gubernamental di Pais Kòrsou, (3) sigui mehorá i fortifiká e atministrashon finansiero i e sistema di kontabilidat di Pais Kòrsou, (4) desaroyá organisashon gubernamental di Pais Kòrsou inkluyendo e koperashon entre e 9 ministerionan, (5) koperashon ekonómiko kual ta inkluí: (a) fortalesé e koperashon ekonómiko den Reino Hulandes i (b) desaroyá mekanismo nan fasilitado i (6) realisá un maneho efektivo i efisiente pa ku e portafolio di terenonan i propiedat inmóbil di Pais Kòrsou.

Tambe ta di mustra riba e hecho kua dia 1 febrüari 2019, e 3 paisnan outónomo Kòrsou, Aruba i Sint Maarten a firma un konbenio pa formalisá reunionnan i kolaborashon tripartit di forma struktural. Un konbenio pa asina enfrentá, pero tambe buska e oportunidatnan ku tin pa interkambiá konosementu, kolaborá i sostené otro.  Parlamentario Curtley Obispo ta aploudí i apoyá e 2 konbenionan ariba menshoná ku ta mustra e importansia di koperashon entre e 4 paisnan outónomo den Reino Hulandes. Pues konbenionan di koperashon entre e 4 paisnan outónomo den Reino Hulandes ta un kos bon!. Huntu ku e meta pa resultadonan positivo pa nos pueblonan den Reino Hulandes.

 

Advertisements
error: Content is protected !!
%d bloggers like this: