Advertisements

DIREKTIVA DI GREENTOWN NO TIN NINGUN INTERES DEN SERA REFINERIA ISLA

DEKLARASHON OFISIAL DI GREENTOWN CURACAO FOUNDATION

 

Willemstad, 7 di febrüari 2019

 

DIREKTIVA DI GREENTOWN NO TIN NINGUN INTERES DEN SERA REFINERIA ISLA

 

Direktiva di GreenTown a tuma nota di ekspreshonnan via medionan di komunikashon i medianan sosial ku e fundashon ta den òf tabatin kòmbersashon ku diferente stakeholder òf ‘preferred bidder’ òf den eventual seramentu di e refineria. Direktiva di GreenTown Curaçao Foundation ta ninga kategóriko di tin tal interes. Ningun miembro di direktiva no (taba)tin kòmbersashon tokante e tópikonan aki ni ku Minister Presidènt ni ku presidente di PMO señor Clift Christian ni ku ningun otro persona òf organisashon.

E fundashon na vários okashon a informá públikamente ku e no ta un desaroyadó pero a ofresé gobièrnu di Kòrsou pa fasilitá komo un ‘denktank’ den e periodo di transishon. Mirando e desaroyonan riba tereno di energia duradero, ku lo dura basta aña promé ku inisiá òf konkretisá, e direktiva ta di opinion ku ta bon pa kuminsá un diálogo riba e posibilidatnan pa desaroyá e partinan di tereno ku no ta usando aworakí.

Na yanüari 2018 direktiva a organisá un mini konferensha den kua e.o. Promé Minister,  Minister di Ekonomia i direktiva di PMO tabata presente. Na e okashon ei un eksperto internashonal a presentá algun opshon pa desaroyá parti di e terenonan bashí rondó di e Refineria. E úniko meta di e fundashon tin ta pa paralelo na buska un partner stratégiko traha riba ambishonnan nobo pa Kòrsou, krea mas kupo di trabou, mehorá situashon ekonómiko i buska formanan pa haña mas entrada pa gobièrnu na bienestar di komunidat, sin mester sera e refineria.

Despues di e mini konferensha a inisiá e idea pa organisá den koperashon ku gobièrnu di Kòrsou i PMO un konferensha grandi ku ekspertonan lokal i internashonal pa e periodo di transishon. Den kontakto ku Promé Minister i PMO a sali na kla ku e úniko prioridat aktual di tantu gobièrnu komo Refineria di Kòrsou ta pa haña riba término korto un partner stratégiko pa e refineria. Pa e motibu aki e  fundashon GreenTown a deshasí algun luna pasá di e inisiativa aki pendiente klaridat den eskoho di un kompania pa operá e refineria. Miéntras tantu e direktiva den konsulta ku ekspertonan a bin ta eduká i informá su mes mas tantu riba tereno di Blue and Circulair Economy i ki impakto positivo esaki por tin pa komunidat.

E direktiva a apuntá dos persona pa papia i skibi den media i media sosial na nòmber di GreenTown. Esakinan ta e presidente Ron Pin i miembro bosero Bianca Neman. Ku otro palabra nan ta e úniko dos personanan ku ta representá e fundashon ofisialmente a ménos ku e direktiva apuntá un otro miembro pa representá e direktiva. Pa e motibunan aki direktiva ta tuma distansia for di tur informashon i resultado ku por surgi pa medio di kontakto ku personanan no afiliá na e direktiva tin ku kualke persona, media òf organisashon tantu lokal komo internashonal. Esaki ta konta tambe pa plataformanan di komunikashon manera Facebook i website. E direktiva di e fundashon aki ta lamentá e konfushon ku e publisidatnan rondó di GreenTown ta trese kuné pero no por karga ningun responsabilidat pa aktonan aheno na miembronan ofisial di direktiva di GreenTown Curaçao Foundation.

Direktiva di GreenTown Curaçao Foundation ta ripití un biaha mas ku e no tin ningun klase di interes pa promové seramentu di Refineria ni di mete den ningun deliberashon i òf negosiashon tokante búskeda di un partner stratégiko. GreenTown Curaçao Foundation ta deseá gobièrnu di Kòrsou éksito den logra su meta ku ta haña un partner stratégiko ku ta kumpli ku tratadonan internashonal riba e área di polushon i mantené asina kuponan di trabou eksistente.  

Advertisements
error: Content is protected !!
%d bloggers like this: