Advertisements

PARTIDO NASHONAL DI PUEBLO: REFINERIA DI KORSOU

REFINERIA DI KORSOU

 

Partido Nashonal di Pueblo ta vigilando di aserka e situashon ku a surgi entorno di nos Refineria i e intrankilidat ku esaki ta okashonando na promé lugá pa e trahadónan di Refineria di Kòrsou i nan famia, pero tambe pa nos komunidat kompleto.

Partido Nashonal ta haña sumamente importante pa Refineria keda den operashon akí na Kòrsou. No tin duda den esei. Esaki pa motibu ku ta dos pilá prinsipal, ku ta Refineria i Turismo, ta karga nos ekonomia. Den nan dos, Refineria ta generá mas divisa ku turismo. Nos produkto di eksportashon number unu ta zeta refiná i number sinku riba lista ta zeta krudo (Bullenbaai). Nos ta konkluí ku pa motibunan makro-ekonómiko, Refineria ta un kondishon sin mas pa nos keda kuné. Naturalmente bou di kondishonnan i reglanan stipulá relashoná ku nos medio ambiente, pa sigui garantisá e empuhe nesesario na nos ekonomia i pa mantené kuponan di trabou direkto i indirekto. Na Refineria tin un kantidat grandi di yunan di Kòrsou di nivel tékniko haltu, ku difísilmente un dos tres lo por adaptá den un industria di servisio manera turismo ta eksigí. Ademas Partido Nashonal di Pueblo no ké pa Kòrsou pèrde e nivel di konosementu i  eksperensia tékniko di un gran kantidat di su yunan. Nos no ke mira mas e menasa di ‘brain -drain’ ku lo obligá nos yunan di tera pa bai buska destino otro kaminda. P’esei tarea di Gobièrnu ta, ku maske Kompania Refineria di Kòrsou tin su Gerente i su Komisarionan, pa motibu di e impakto sosial-ekonómiko i impakto den rekurso humano, nos ke mira un posishon mas fiho i determinante di nos gobièrnu pa duna direkshon. Den un ambiente dividí, lo ta difísil pa atraé un kompania serio, pasobra ningun kompania serio no ta bai “ gamble” ku su nòmber. Ta importante pa e hóbennan ku a prinsipiá nan estudio tékniko na skol di Refineria, keda mantené e speransa pa trabou i asina forma parti di e grupo di relevo na Refineria.

Partido Nashonal di Pueblo tin un problema serio ku e forma ku e proseso pa buska un partner stratégiko nobo pa Refineria ta tumando  lugá. E guia i liderazgo ku te ku awor aki nos a persibí ta demonstrá un falta di liderazgo i direkshon. Miéntras ku sindikatonan ta ekspresando i ta moviendo den direkshon di Venezuela, tim tékniko ta negoshando di un banda sin un mandato kla, fiho i prometedor pa solushoná nos problemanan. Esaki nos por dedusí for di den un korant lokal di dia 5 di febrüari 2019, kaminda ku e konsultant merikano a introdusí un trayekto paralelo, kaminda por destilá ku aparentemente tim di RDK/Gobièrnu tabata negoshá ku dos kompania pareu. Te hasta den e mesun artíkulo e rapòrt forènsiko di Ivy Advokaten, ta menshoná ku sierto reunion a tuma lugá tambe na kas di Kordinadó di Proyekto. Nos ta puntra nos mes, ta ken tabata kordinadó di proyekto, anto si e kordinadó no tabatin kantor???Nos ta puntra nos mes tambe, si e enkargo i kuadro di referensia riba papel di parti di Gobièrnu/ Akshonista i Komisarionan tabata bon deliniá?? Pues ora ta kana dos kaminda tardi òf tempran, kos ta brua. Na opinion di Partido Nashonal di Pueblo, tin piesanan klave ku a faya drástikamente den tur e timnan ku a wòrdu formá i kasi tur hende ku a faya aki, a pone un banda.

Nos situashon ekonómiko aktual ta eksigí un liderazgo vishonario i fuerte. Mester por yega na un liderazgo fuerte.

 

Di parti di Partido Nashonal nos ke proponé pa sea den e tim negoshadó o di forma “klankbord” inkluí tambe, ekspertisio negoshadó ku ta prosedé di representashon di trahadó, pa salbaguardiá nan interes banda di ekspertisio tékniko i ekspertisio hurídiko. Ademas e aspekto di konfiansa den e proseso i e echo ku no ta trata di trahadó so, pero nos ta tene kuenta tambe ku e efekto den kas di famia.  Partido Nashonal di Pueblo por trese esaki dilanti ku tur outoridat pasobra nos partido ta prosedente di e klase trahadó. Tambe nos ta di opinion ku pa fortifiká liderazgo, Minister-President mester duna partisipashon transparente i partisipativo na nos komunidat. Por logra esaki si regularmente Minister-President bin duna kuenta i rason na nos komunidat di un forma habrí i transparente via di ruedanan di prensa, diskursonan nashonal, i otro medionan sosial pa raportá kon e proseso ta kanando, unda e problemanan ta i kon ta bai solushoná nan. (voortgangrapportages). Esaki ta nesesario pasobra nos ta den un situashon di “countdown” pa fin di 2019, ku hopi intrankilidat laboral na Kòrsou.  Minister-President, bin duna “voortgangsrapportages” Esaki ta krea konfiansa

Por último nos lo ke sa di Gobièrnu kon ta pará ku e krudo pa por refiná den nos Refineria pa asina por garantisá pago di salario di e trahadónan di Refineria Isla pa sigur por lo ménos e próksimo 3 lunanan. Di e forma aki por garantisá komunidat di Kòrsou tambe ku e nesesidat energétiko lo wòrdu kumplí kabalmente kuné. Esaki lo por trese un parti di e trankilidat bèk den nos komunidat ku nos tin derechi riba dje.

Advertisements
error: Content is protected !!
%d bloggers like this: