Advertisements

Parlamentario Curtley Obispo: Meta konbenio di asistensia tékniko: sigui krea oportunidatnan nobo i resultadonan positivo pa nos pueblo di Kòrsou.

Meta konbenio di asistensia tékniko: sigui krea oportunidatnan nobo i resultadonan positivo pa nos pueblo di Kòrsou.

Parlamentario Curtley Obispo ta di opinion ku Kòrsou tin ku sigui krese riba tur nivel i aspekto pa asina nos alkansá e máksimo potensial di Kòrsou. Si, Kòrsou, tin i mester sigui krese na bienestar i progreso di nos tur ku ta biba aki na Kòrsou. Nos tur ke pa entre otro ekonomia di Kòrsou krese, nos tur ke pa finansa publiko di Kòrsou sigui krese i nos tur ke pa e kalidat di servisio di e aparato gubernamental sigui krese. Nos tur ke pa Kòrsou krese, krese pa mas resultadonan positivo i asina krea mas oportunidatnan pa nos tur ku ta biba aki na Kòrsou. Un Kòrsou mas mihó, uni i pa dilanti pa nos tur.

Ta p’esei e plan di strategia di kresementu Kòrsou ta importante den kuadro ariba menshoná i tambe importante ta e konbenio firma dia 21 yanüari 2019 entre Pais Kòrsou i Pais Hulanda. Un konbenio di koperashon i asistensia tékniko riba diferente área kual sigur ta sigui fortifiká e relashonnan entre Pais Kòrsou i Pais Hulanda. Asistensia tékniko kaminda tin e nesesidat di Pais Kòrsou den forma di rekurso humano i konosementu ku e meta progreso i bienestar di Korsou. Un konbenio kaminda a deliniá e forma kon ámbos pais mester atendé ku otro a base di igualdat i rèspèt mutuo. Kada pais ta mantené nan propio responsabilidat, tareanan, outonomia i outoridat den Reino Hulandes.

Parlamentario Curtley Obispo ta di opinion ku firma di e konbenio ariba menshoná, Kòrsou a sigui mantené su outonomia den Reino Hulandes ku a firma pe for di 10 òktober 2010. Statüt di Reino Hulandes i Areglo di Estado di Kòrsou a keda intakto manera nan ta vigente for di 10 òktober 2010. Tur parlamentario i minister ku a sirbi nos Pais Kòrsou for di 10 òktober 2010 sa bon bon ku e konbenio firma no ta afektá outonomia di ningun di e 4 paisnan den Reino Hulandes. Tambe no ta promé bes ku ta firma e tipo di konbenionan aki i mester indiká ku den pasado Pais Kòrsou i Pais Hulanda a yega di firma konbenionan di koperashon entre otro na aña 2012 i aña 2016.

Konkluyendo e konbenio di asistensia i koperashon tékniko firma 21 yanüari 2019 su meta ta pa sigui krea oportunidatnan nobo i resultadonan positivo pa nos pueblo di Kòrsou.

Advertisements
error: Content is protected !!
%d bloggers like this: