Advertisements

Falta di integridat…

Falta di integridat…

Na aña 2013 Parlamento di Kòrsou a aprobá e desishon di Gobièrnu pa buska un partner stratégiko pa refineria di Kòrsou, lokual a kondusí na  MDPT 1. Esaki pa diferente motibu entre otro ku e kontrato di refineria lo finalisá na aña 2019.

Den e proseso pa yega na un partner stratégiko, ta di lamentá ku nos por konstatá ku falta di integridat a stroba e proseso diferente biaha.

Komo Parlamentario, señora Pauletta a duna frente na esaki, diferente biaha den parlamento di Kòrsou. A kuestioná i retirá e MDPT anterior pa mal uso di e fondo nan disponibel. A keda komprobá ku a hasi gastu nan indebí na nòmber di pais Kòrsou. Atrobe nos ta tuma nota di un rapòrt ku ta indiká kaso di fayo nan grandi den integridat i posibel aktonan kastigabel.

Esaki tin konsekuensia direkto pa nos Pais i awe nos por tuma nota di esaki. Kompanianan serio ta kibra e proseso di negosiashon pa no ta enbolbí den kasonan kastigabel. E proseso di yega na un partner stratégiko ta sumamente importante pa Pais Kòrsou, no solamente 1500 persona ta dependé direktamente di e refineria, si no 4500 persona ta dependé di forma indirekto di e sektor petrolero. Sin lubidá nan famia. Un falta abrupto di e sektor petrolero lo ta un gòlpi enorme pa nos Pais.

Nos no por laga falta di integridat sigui korumpí oportunidatnan ku ta wòrdu kreá pa bienestar di un i tur. E proseso pa yega na un partner stratégiko ta kontinuá i kada bes ku identifiká ku tin kaso di falta di integridat mester denunsia esaki.

Ku e diferente kambionan den aña 2019, tereno ta liber, pa personanan di mala fe, mal informá, hunga weganan polítiko i ademas sali na interes di otronan, ku no ta Kòrsou. Pero mas importante sin aportá ku ningun solushon. Komo siudadano ku stima Kòrsou no laga mal informashon nubla bo manera di pensa. Den e pais aki norma i balor ta keda nos fortalesa di mas grandi.

Ana Maria Pauletta

Advertisements
error: Content is protected !!
%d bloggers like this: