Minister Jesus-Leito ta entregá dekreto ministerial na nos peloteronan profeshonal pa un tereno pa desaroyo di kompleho deportivo

Minister Jesus-Leito ta entregá dekreto ministerial na nos peloteronan profeshonal pa un tereno pa desaroyo di kompleho deportivo

 

Willemstad – Dia 28 di desèmber 2018, Minister Zita Jesus-Leito a firma i entregá e dekreto ministerial na BE – MVP Club i 5 triple 9 pa haña un tereno di Gobiernu den forma di ‘erfpacht’ pa desaroyá dos proyekto den un kompleho deportivo na Groot Kwartier. Minister Jesus-Leito semper ta sostené esfuersonan i desaroyonan positivo, den kaso aki deporte. Di e forma aki, tres hoben deportivo, di kual e peloteronan profeshonal, Jonathan Schoop, Kevin Moesquit, i deportista Ivan Maury de Windt ta haña e oportunidat pa realisá nan soño di un fasilidat deportivo.

E fasilidat lo konsistí di un vèlt di beisbol multi-funshonal kaminda nos futuro peloteronan i nos peloteronan profeshonal por praktiká i prepará nan mes pa e deporte di beisbol. 5 triple 9 lo tin fasilidat multi-funshonal ku e meta pa instruí ‘fitness’ funshonal i desaroyo di ‘wellness’ pa kultivá mihó kalidat di bida. E enfoke ta riba prevenshon, restourashon, abilidat i prestashon.

Bunita ta ora ku hóbennan lokal ke duna algu bèk na nan pais. E inisiativa aki ta un oportunidat úniko pa uni forsa, pa huntu karga i sostené deportistanan profeshonal lokal. E realisashon di e proyekto aki ta bai brinda un tremendo oportunidat pa un biaha mas Kòrsou marka historia ku un kompleho deportivo últra moderno den nos region.

Minister Jesus-Leito ta rekonosé i sostené individuonan ku tin un ambishon i ta duna mihó di nan mes pa realisá esaki ku e rekursonan disponibel. Di e forma aki, Gobièrnu ta motivá siudadanonan, hobennan pa biba pa un kousa, enkurashá soñadónan pa bira mas aktivo i produktivo i rekonosė tur  ‘Bon Yu Di Kòrsou’ pa nan dedikashon i perseveransia kontinuo. Tur esaki, ku e speransa ku mas persona ta sigui e kaminda rekto i traha duru pa realisá nan propio soño.

Un danki spesial ta bai na gerensia di UTS ku a fasilitá e tereno na disponibilidat di Gobièrnu ku a hasi e realisashon di e proyekto aki posibel .

Minister Jesus-Leito ta konvensí ku e proyekto aki ta bai trese speransa den hopi persona i sigur nos hobennan su bida i duna esnan ku tin mester di un èkstra empuhe, e guia i inspirashon nesesario pa tuma akshon pa por logra nan soño.

For di awor, Minister Jesus-Leito ta deseá e grupo di BE MVP CLUB eksito ku realisashon di e kontrukshon di e kompleho deportivo mulifunshonal aki.

*Riba e potrèt athunto ta mustra momentu ku Minister Jesus-Leito ta entregá e dekreto ministerial na Jonathan Schoop, Kevin Moesquit, i Ivan Maury de Windt.*

..

.

error: Content is protected !!