Advertisements

Mensahe di Pasku 2018 di Gobernador

Mensahe di Pasku 2018 di Gobernador

Geplaatst op 25 Desèmber 2018 dor di Ministerio di Asuntunan General i Promé Minister

WILLEMSTAD –

Diskurso di Sra. Gobernador di Kòrsou na okashon di selebrashon di Pasku 2018

Apresiado i kerido siudadanonan,

E palu di pasku ta bunita dòrná atrobe. Den hopi kas lo tin pesebre. I tantu posibel a sende
lus èkstra paden i pafó di kas. Kisas algu ménos ku den otro añanan, pero tòg…
Na misa nos lo bolbe skucha e kuenta di Pasku. Famianan ta bini huntu atrobe i ta bai bishitá
amigu. Asina nos ta krea huntu e ambiente di Pasku.Selebrashon di binida di e Prinsipe di
Pas, Kristu Hesus!

Un sensashon di protekshon i di solidaridat. Tambe un sintimentu di siguridat i di konfiansa.
Tur hende tin nesesidat di e balornan inmaterial akí. Ta presioso ku nos por pasa nan pa otro
sin ku nan ta kosta nos ni un sèn chikí. I pasando nan pa otro, di mes nos ta haña nan bèk,
anto multipliká!

Lamentablemente nos por yega na pèrdè e sintimentu di siguridat i protekshon ei tambe.
Por ehèmpel, komo konsekuensia di eksperensianan negativo ku ta kousa desapunto den
nos próhimo o den gobièrnu. E ora ei e konfiansa ku nos a duna ta keda defroudá i
relashonnan ta perturbá. Hende ta disidí ku nan no ta partisipá mas; ta loke por pasa den
famia mes, pero tambe den komunidat komo totalidat.

Si ta djis un biaha bo pasa den un eksperensia asina, bo por surpasá e desapunto. Pero si bo
nota ku ya ta un patronchi di desapunto ku ta ripití…, ku e sintimentu ku atrobe bo a ked’afó
ta surgi…, e ora ei e daño hasí n’e konfiansa ta bira ireparabel. E ora ei henter komunidat ta
chumba. A todo kosto nos mester evitá sirkunstansianan asina.

E sintimentu akí ta bira mas fuerte si hende no por partisipá plenamente den komunidat. Si
siudadanonan pèrdè e debido konekshon pa motibu di retraso den enseñansa òf si nan no
tin akseso na servisio sosial, esakinan ta kondusí na malkontentu i deskonsierto. E ora ei
hende no ta mira salida i nan ta buska nan propio solushon.

E sintimentu desagradabel akí por surgi tambe ora pa diferente rason, gruponan ekskluí
otro for di partisipashon den komunidat, motivando ku… ‘awor ta nos ta na bùrt’. Entre
tantu nos komo komunidat sa bon bon kon aktitut asina por desviá komunidat for di riba
bon kaminda i ta bin duna lugá na mundunan separá. Sí … tambe den un pais chikitu manera
esun di nos. Un komunidat dividí. No ta algu ku nos mester deseá den e Kòrsou akí di nos.
Nos tur por pensa un kantidat di motibu pa defendé nos komportashon; e ora ei nos ta bisa
por ehèmpel: ‘ya… t’asina nos ta, ta nos kultura… ‘si ami no hasié, un otro ta pasa mi dilanti
anto e sí ta hasié.’

Pero… bisa bèrdè. T’asina nos ke biba ku nos mes? Buska netamente interes propio ta
perhudiká e solidaridat ku tantu nos mesté den e komunidat akí.

Presisamente den tempu difísil nos mester apoyá otro. Nos no mester buska pa ‘chika lachi
di shon Jan’. Sierto moderashon ta un virtut; sigur si komo komunidat nos sa ku nos no por
distribí sin kòrda mañan. Esei lo por oumentá e base di sosten pa medidanan, ku tin bia ta
nesesario pa tuma.

Ban yuda otro kontrarestá e reflèks di ‘pone nos propio interes dilanti’. Laga nos tene otro
riba bon kaminda, esta pa podernan djafó no tin nodi di bin koregí nos vupánan. Logra keda
riba bon kaminda ta hasi nos orguyoso di nos mes. I riba tur kos, nos yunan tambe lo ta
orguyoso di nan mayornan, i nos… orguyoso di nan. Nos komunidat lo bira mihó i mas
bunita ainda.

Méskos ku mayornan mester ta bon ehèmpel pa nan yunan, asina nos gobernante i lidernan
di komunidat tambe mester sirbi di bon ehèmpel pa siudadanonan. ‘Ta esnan na kabes’
hopi bia ta determiná e forma di aktua i komportá di siudadanonan denter di
organisashonnan i den e komunidat. Shòbel e bará di norma ku balor ta hiba na dekadensia.
Esaki no ta nifiká nesesariamente ku na pia di lèter nos ta kumpli ku e norma- i balornan
tradishonal, sino ku bou di tur sirkunstansia nos ta mantené nan esensia bibu.

P’esei reflekshon riba nos propio komportashon i forma di aktua ta di importansia. Nos
mester keda tene na kuenta ku te ainda nos ta riba bon kaminda, i koregí nos mes kaminda
ta nesesario. Ta klaro ku nos mes tambe sa esei. Kada ken den su mes ambiente por hasi
esei na su mes manera. Mi ta trata mi yunan honestamente i nan tur, ku mes dedikashon;
kon mi ta biba ku mi bisiñanan; ta korekto pidi hende fabor, buska privilegio; mi ta tuma mi
responsabilidat komo dirigente òf komo lider; anto mi ta skohe pa tene kuenta ku bienestar
general di nos komunidat òf mi ta pensa riba interes di mi grupo, òf di mi mes so.

Nesesidat den nos pais ta grandi. Tantu na nivel individual komo na nivel sosial kolektivo. Na
tur dos nivel nos lo mester traha duru. Nos mester konsultá nos kompas di moralidat pa nos
kana eksitosamente riba bon kaminda. Ma una bes esaki logra… trankilidat i satisfakshon ta
reina, tambe trankilidat di alma. Esfuerso grandi ta rekerí di nos tur pa restourá i mantené
kosnan den nos pais na òrdu. Ta di e manera akí nos lo por haña siguridat; konfiansa i
siguridat serka otro.

Ora ta Pasku, puresa i vulnerabilidat di e yu resien nasí ta fundamental. Pero komo pais
hóben nos ta igualmente vulnerabel i nos huntu mester vigilá nos puresa. Na Kòrsou nos un
ta dependé di otro pa desaroyá nos pais mas aleu. E potensial mes t’ei; pero ta pidi pa nos
duna otro e espasio pa nos desaroyá nos mes. Partisipashon di tur hende den sosiedat ta e
mihó garantia ku hendenan ta sinti nan responsabel, i pasobra nan ta enbolbí…, ku nan
tambe ta konta. Riba e base akí nos lo por gana huntu un siguridat i un solidaridat nobo.

Tambe na nòmber di mi esposo, mi ta deseá tur hende un Pasku maravioso.
Ku e lus di Pasku bria de kurason di kada un di nos!

Advertisements
error: Content is protected !!
%d bloggers like this: