Advertisements

MINISTER JESUS-LEITO TA INOUGURA LUSNAN DI KAYA LED INTELIGENTE DEN JULIANADORP KOMO INISIO DI AQUALECTRA SU RET DI UTILIDAT INTELIGENT

MINISTER JESUS-LEITO TA INOUGURA LUSNAN DI KAYA LED INTELIGENTE DEN JULIANADORP KOMO INISIO DI AQUALECTRA SU RET DI UTILIDAT INTELIGENTE
Willemstad- Ku un tablet,  remplasando Minister di energia, Minister Armin Konket , a entregá Minister enkargá ku Tráfiko, Transporte i Planifikashon Urbano, sra. Zita Jesus-Leito pa sende e lusnan di kaya nobo nobo “full LED” konektá riba e ret di utilidat inteligente di Aqualectra. Ku e akto aki e promé paso a keda tumá pa konektá Kòrsou riba e ret di utilidat di futuro den presencia di un gran kantidat di habitante hopi kontentu di Julianadorp ku tabata presente awe tardi.
Esaki ta un proyekto piloto ku Aqualectra a inisiá pa instalashon di un ret inteligente rònt Kòrsou kaminda lusnan di kaya ta LED i ku ta traha riba un sistema pa manehá e lusnan di un forma inteligente.
Denter di poko lo start tambe ku un proyekto piloto pa kas i negoshi pa keda konektá riba meternan inteligente. Tres kontratista a traha simultáneamente for di novèmber último di forma diligente, huntu ku profeshonalnan di Aqualectra pa planta no ménos ku 480 palu di lus i instalashon pa lus LED inteligente pa awe, nèt den porta di dia di fiesta pa sende e lusnan.
Lusnan inteligente den e dos barionan
Ora un hende ta pensa lusnan di kaya LED inteligente e mester pensa riba p.e. lusnan ku ta usa ménos energia (LED), ku klaridat ta oumentá òf ta keda redusí segun moveshon den su bisindario, ta manda alarma pa un punto sentral ora tin ‘storing’ i ku kapasidat di keda sende paga (flash) ora tin un emergensia.  Den futuro ta kontrolá kada lus individualmente meskos ku kada meter di awa i koriente.
Aqualectra, huntu ku UTS, a monta e promé antèna ku transmitor pa e ret inteligente di Kòrsou. Esaki ta hasi e proyekto piloto posibel den e Julianadorp i Seru di Domi debí ku for di e antèna na Seru Pretu por manehá komunikashon ku tur punto inteligente den e dos barionan. Seri Domi anteriormente ya a keda skohé komo e bario piloto pa e meternan di awa i koriente inteligente ku Aqualectra ta bai introdusí, pues ta probechá instalá mesora e lusnan di kaya inteligente tambe den e bario.
Julianadorp su infrastruktura di lus di kaya ta data for di tempu di Shell i práktikamente no ta funshoná mas. Ku e proyekto piloto aki a pone un infrastruktura pa lusnan di kaya LED riba pia i mesora pasa pa instalá e módulonan inteligente pa manehá e lusnan aki. Lo instalá un kantidat di 550 punto di lus inteligente den e dos barionan. Ta trata di un invershon di Nafl. 1.6 mion. E eksperensia i konosementu kolektá, atrabes di e proyekto piloto aki, lo sirbi tambe pa perfekshoná e konfigurashon di e infrastruktura ku mester karga e ret inteligente di utilidat. Mientrastantu por bisa tambe ku e destaho pa kambia e lusnan di kaya rònt Kòrsou ta kanando di forma satisfaktorio.
Koperashon i komprenshon rumbo utilidat di futuro
E kambio rumbo pa utilidat di futuro ta unu eksitante, pero ta eksigí komprenshon, indulgensia i koperashon na momentu ku ta enkaminá e rumbo aki. Poko poko pero sigur Aqualectra ta kambiando, no únikamente su meks di produkshon pa e ta mas stabil, pero tambe pa e ta mas sostenibel, pero na mes momentu ta krea un ret di destribushon ku ta robusto i mas inteligente pa brinda e kliente di Aqualectra un eksperensia ku ta pas ku su eksigensianan moderno. E trayekto aki kaminda Aqualectra, Servisio pa Obra Públiko di Ministerio di Tráfiko, Transporte i Planifikashon Urbano i UTS ta kolaborá ta proba ku huntu nos por i lo krea awe e utilidat di mañan.
Aqualectra rumbo pa ekselensia
Advertisements
error: Content is protected !!
%d bloggers like this: