MIHÓ KOYON KU DIOS PORDON. PREVENÍ TA MIHÓ KU LAMENTÁ. TIN KAIMAN NA BOKA RIU!

MIHÓ KOYON KU DIOS PORDON. PREVENÍ TA MIHÓ KU LAMENTÁ. TIN KAIMAN NA BOKA RIU!
Djabièrnè 21 di desèmber 2018,
Fin di aña ta yegando i manera ya ta e tradishon, tin hopi mas tantu sèn ku normal ta sirkulá den nos komunidat. Esaki ta debidamente konosí tambe pa esun ku ta skohe na kometé un atrako i/o ladronisia en bes di proveé di un forma legal pa su mes.
Pa yuda halsa seguridat den nos komunidat i alabes evitá mas tantu posibel ku siudadanonan ta bira víktima di aktonan kriminal manera atrako ku violensia i ladronisia na man di e antisosialnan aki, Ministerio Públiko huntu ku Kuerpo Polisial ta duna algun rekomendashon pa bo ta mas safe den e fin di aña aki.
▪ Evitá di kana ku (hopi) sèn kèsh. Purba di ‘swipe’ mas tantu posibel;
▪ Plania bo dia bon i evitá asina di lanta sèn den oranan di anochi na un bankomátiko;
▪ Den kaso ku tòg bo mester bishitá un bankomátiko den oranan di anochi, skohe pa un ku tin sufisiente iluminashon i ménos alehá;
▪ Si bo ta hasi transakshon via di ‘drive thru’, lòk bo portanan di outo i sera bo glasnan ku eksepshon di esun kaminda bo ta sinta pa hasi transakshon;
▪ Hasi uso konstantemente di bo spilnan di outo pa evitá ku bo ta wòrdu sorpresa;
▪ Laga bo motor di outo sende, pa si bo mester ranka bai, bo por hasi esaki di inmediato;
▪ Memorisá bo number di bankomátiko sekreto. No skirbié ni hink’é den bo pòtmòni;
▪ Ta bon pa hendenan di edat bai lanta sèn den kompania di un persona di konfiansa. Nan ta un grupo hopi vulnerabel;
▪ No saka bara di sèn den grupo di hende i tampoko na momentu di paga;
▪ Evitá di move anochi bo so riba kaya na pia;
▪ No laga bo telefòn ta visibel. Ta un di e promé kosnan ku e atrakadó ta kue pa evitá ku despues di nan akto bo por yama polis;
▪ Si pa un òf otro motibu tòg bo mester tin hopi sèn kèsh huntu ku bo, no pone tur e sèn huntu. Si bo wòrdu atraká, bo ta pèrdè tur kos den un solo bia.
▪ Wak bo tas, spesialmente si bo ta ta move na pia, pasombra tin outo nan ku persona aden ta kore rònt i ta ranka tas bai kuné.
Si resultá ku tòg bo keda atraká:
▪ Keda trankil mas tantu posibel;
▪ Duna loke ku nan pidi. Bo bida ta bal mas ku material;
▪ No resistí. Bo por sali heridá;
▪ Si bo ta den outo kuminsá pita i si bo ta na pia kuminsá grita pa hala atenshon di otro siudadanonan;
▪ Yama polis mesora na 911. No bai yama ningun otro hende promé, pa motibu ku tantu abo komo víktima i nos komo polis ta pèrdè tempu balioso;
▪ Trata di kompilá mas tantu dato di e atrakadó i pasa e informashonnan aki pa polis;
▪ Nunka keda sin duna keho. Bo denunsia por solushoná otro kasonan ku ainda ta pará habrí.

KAS / NEGOSHI:
E lugá kaminda bo ta biba, sea ta bo mes kas òf un kas ku bo ta hür i e plan di prevenshon ku bo apliká ta determiná te ki grado bo por usa medidanan di seguridat pa kita un ladron di skohe bo kas pa kometé un akto kriminal.
Ta práktikamente imposibel pa hasi un kas 100% sigur di moda ku ladron no por kibra drenta aden. Pero mas difísil bo hasi pa un ladron / atrakadó, mas impreshon bo krea ku bo kas ta bon protehá i vigilá, mas chèns tin ku e posibel ladron / atrakadó lo legumai i buska un kas ku ta mas fásil pa drenta.
Promé ku bo kuminsá usa medidanan di seguridat kontra di ladronisia/kiebro/ladronisia ku violensia, bo mester studia bo situashon debidamente. Hopi biaha no ta nesesario pa bo instalá medidanan kompliká.
Un malechor tin masha poko tempu. Nan ke drenta i sali for di bo kas mas rápido posibel, pasombra mas tempu e pasa paden, mas chèns tin ku ta gar’é.
Kuerpo Polisial i Ministerio Públiko ta preokupá pa bo seguridat. P’esei e ke hasi bo alerta, pa huntu nos kombatí e ola di kriminalidat. “MIHÓ KOYON KU DIOS PORDON. PREVENÍ TA MIHÓ KU LAMENTÁ. TIN KAYMAN NA BOKA’ RUI !”

error: Content is protected !!