Advertisements

Spesialistanan ku kuido kompletu den Hospital

Spesialistanan ku kuido kompletu den Hospital  

WillemstadSpesialistanan ku kuido kompletu den hospital, lokual na hulandes ta keda yamá: “Geïntegreerd Medisch-Specialistisch Bedrijf”, GMSB, ta un kolaborashon entre hospital i e spesialistanan, kaminda ku rèspèt pa kada un su responsabilidat ta sòru pa e pashènt haña un kuido kompletu i e pa kalidat di kuido ta bon.  Un eksigensia pa esaki ta, ku tur e spesialistanan ta traha den hospital.

 

Un hende no ta un ser ku ta konsistí di órganonan físiko so, manera un kurason, pulmon òf nir. Un hende ta un ser físiko, mental, spiritual, emoshonal i sosial i meresé un aserkamentu kompletu i total.  Por ehèmpel un pashènt ku keda malamente heridá den un atrako, mester banda di kuido físiko, na mes momentu un guia sikológiko.  

Tambe e kuido kompletu i total, ta un alivio pa e pashènt, paso e por bai na un solo sitio -e hospital-  i haña tur spesialista den un tiru i riba mesun dia, en bes di bai ofisina pa ofisina, kisas sin sèn pa bus.  

A la bes, tur tipo di instrumento médiko ta den un edifisio huntu i e pashènt por hasi tur su tèstnan na e mes kaminda den un dia sin e molèster pa un hende malu, sin bai pariba i pabou.

Ademas e koleganan spesialista ta yuda tene otro skèrpi, siendo ora ku tin un dòkter ta traha su so den su ofisina, no tin kòntròl di niun kolega dòkter riba dje. Kemen traha huntu den hospital ta netamente un garantia pa kalidat di e kuido médiko i seguridat di pashènt! Ta pa e motibunan aki un eminensia manera Prof. dr. Bob Pinedo tambe ta boga pa tur spesialista bai traha huntu den hospital, i gobièrnu di Kòrsou for di aña 2009 a introdusí e maneho aki.

Ta bon pa bisa, ku si e peso di un ofisina propio ta asina pisá ku mester manten’é pagonan desproporshonal na speshalistanan, siendo ku e infrastruktura ta den hospital nobo dikon no hasi netamente uso dje oportunidat baha gastu di pais dor di traha huntu i drenta den e hospital nobo? Esaki ta hasi inkomprendibel dikon no ke traha huntu. Naturalmente ku un traspaso mester ta bon reglá. Na  e momentunan aki ta evaluando kon e proseso di traspaso lo por tuma lugá mihó posibel.

Pa terminá, lo ta bon pa si tin spesialista ku a nota ku e kolega spesialistanan den Sehos no ta duna e kalidat di kuido nesesario, e informá Inspekshon di Salú ta kua ta su koleganan ku ta duna trabou defisiente pa Inspekshon di Salú por atendé mes ora ku nan na benefisio di e pashèntnan. Ta huntu nos tin un responsabilidat pa mehorá e kalidat di kuido.

 

Advertisements
error: Content is protected !!
%d bloggers like this: