Advertisements

PRIZON TA DUNA TRATO HUMANO NA TUR DETENIDO

PRIZON TA DUNA TRATO HUMANO NA TUR DETENIDO

Geplaatst op 20 Desèmber 2018 dor di Ministerio di Hustisia

WILLEMSTAD  – Mando di prizòn a tumá nota di un posibel kaso den korte ku detenidonan lo ke entamá pa supuesto trato inhumano ku nan ta risibí den prizòn. Segun publikashon den prensa detenidonan lo tin reklamo riba riolering, plaga di muskita i sangura, eskases di kuminda i falta di aktividat  riba tereno di resosialisashon.

Pa loke ta trata eskases di kuminda mando di prizòn ta garantisá ku ta sirbi detenidonan tres kuminda pa dia. Mando di prizòn, konsiderando situashon finansiero di pais ta hibando un kontrol mas di aserka pa evitá ku tin un sobr’é kantidat di kuminda, sin mishi ku e kalidat di kuminda konforme reglanan internashonal di derechinan humano.

RESOSIALISASHON

Pa loke ta trata resosialisashon por menshoná diferente proyekto ku a keda realisá den 2018 pa detenidonan manera por ehèmpel e Social Innovation Award ku un detenido a gana e aña aki pa produktonan inovativo ku e la diseñá.  Tambe detenidonan a drecha mas ku 1000 buki di skol pa nos hóbennan.  Den e proyekto di kosementu detenidonan ta siña fura stul i kose paña i na e momentonan aki bou di guia di un profeshonal nan ta kose hasta unifòrm pa e personal di e instituto. Dia di Bandera detenidonan a kose un kantidat grandi di trahe ku a wòrdu usa durante di e aktividatnan ofisial. Tabatin  kampionato grandi di dominó ku a keda organisá den SDKK. SDKK huntu ku ministerio di SOAW a organisá diferente kurso pa detenidonan. Asina por sigui menshoná diferente proyekto mas ku a tuma lugá e aña aki.    

Mando di prizòn su deseo ta pa edukashon na tur nivel pa tur detenido, pero den práktika ta imposibel pa kumpli ku esaki. Mas tantu ku ta posibel mando di prizòn ta sòru pa kursonan práktiko den kual detenidonan por desaroyá nan talentonan i siña un fishi ku por yuda nan pa gana nan pan di kada dia, ora nan kaba di sinta nan kastigu.

KARTA POSITIVO

Remarkabel ta e kontenido positivo di un karta ku e detenidonan di Sint Maarten a skibi den kual nan a ekspresá e bon trato ku nan a risibí den prizòn na Koraal Specht. Detenidonan tin derechi di yama nan famia na telefòn dies minüt pa dia, nan por risibí bishita un ora kada dos siman a base di sita, nan ta haña kuminda tres biaha pa dia, nan ta risibí eis, kada detenido ta risibí unifòrm pa nan bisti, esnan ku ta traha ta risibí pago  pa nan labor, nan famia por pone te un máksimo di sinkushen florin pa luna pa por kumpra produkto konforme nan deseo riba kantin. A base di un lista ku nan ta yena prizòn ta sòru p’e produktonan aki wòrdu kumpra. SDKK no ta kobra nada èkstra pa e servisio aki.  Tur esaki ta mustra ku mando di prizòn ta hasi tur esfuerso pa duna trato humano na detenidonan.

Pa loke ta trata estado físiko di prizòn mester bisa ku último añanan invershonnan kuantioso a keda hasí pa mehorá e infrastruktura di prizòn den kuadro di palabrashonnan  den e Plan van Aanpak entre Kòrsou i Reino Hulandes. Den e último rapòrt di CPT riba prizòn, prizòn a skor bon riba e parti aki. Pero echo ta ku un edifisio bieu mester di mantenshon kontinuo.

INSIDENTE

Naturalmente ora tin insidentenan manera un riolering ku ta blòkia òf molèster di muskita òf sangura mando tin ku buska solushon dor di kana e prosedura finansiero ku lei ta preskribí pa pa por kombatí esaki i/o trese reparashon. 

Por último mester enfatisá ku kada detenido ku ta detené den SDKK ta pa motibu ku nan a kometé un òf otro delito kontra lei.  I nan ta sera den SDKK pa sinta nan kastigu. Pais tin e obligashon konforme tratadonan internashonal pa garantisá trato humano di tur detenido, pèrkurá pa nan  nesesidatnan básiko i duna un trato igual na tur detenido. 

___________________

Direktor di SDKK

U.L Floran

Advertisements
error: Content is protected !!
%d bloggers like this: