Advertisements

Edifisio di Juan Pablo Duarte VSBO

Edifisio di Juan Pablo Duarte VSBO

 

WILLEMSTAD- Ministerio di Enseñansa, Siensia, Kultura & Deporte (E.S.K.D.) ta informá ku Direktiva di Skolnan Públiko, ARBO Consult, Stichting Onderhoud Schoolgebouwen (S.O.S.), Sektor di Enseñansa i Siensia ta kanando huntu ku KWI Solutions B.V. i CEGE Caribbean pa traha mas lihé posibel pa e situashon di skol Juan Pablo Duarte VSBO (JPD) normalisá.

Pa loke ta trata e investigashon di posibel asbèst ku por tin den algún lokal na JPD, Ministerio di E.S.K.D.  ta indiká ku esaki ta kanando konforme palabrashon.

E promé pruebanan a tuma lugá i ta kanando e trayekto pa hasi e limpiesa nesesario pa e lokalnan por keda liber di asbèst bèk. E echo ku mester kue mas muestra den e lokalnan konserní pa manda Hulanda pa hasi e tèstnan nesesario, tin influensia riba e tempu pa finalisá e trayekto.

Importante den henter e proseso aki ta ku mester tene bon kuenta ku reglanan internashonal pa loke ta trata asbèst. Huntu ku tur ‘stakeholders’ responsabel ta kanando un trayekto konforme e reglanan stipulá, kaminda tur partner envolví ta keda satisfecho. Meta ta pa tur alumno i dosente regresá skol bèk den un edifisio ku ta limpi segun reglanan vigente.

Ministerio di E.S.K.D. den estrecho koperashon ku stakeholders ta hasiendo nan máksimo efsuerso pa e skol ta aksesibel bèk mas lihé posibel den un ambiente saludabel. Na momento ku e resultado di e tèstnan yega bèk for di Hulanda, por duna un indikashon mas konkreto di ki dia por kuminsá hasi uso di e edifisio.

Tumando e puntonan ariba na konsiderashon Ministerio di E.S.K.D. ta pidi komprenshon i indulgensia di kada mayor, alumno i dosente.

Advertisements
error: Content is protected !!
%d bloggers like this: