MEO TA PUBLIKÁ LISTA DI PÈRMITNAN KU NO A KEDA REKOHÉ NA LOKÈT DI PÈRMIT

MEO TA PUBLIKÁ LISTA DI PÈRMITNAN KU NO A KEDA REKOHÉ NA LOKÈT DI PÈRMIT

 

WILLEMSTAD- Ministerio di Desaroyo Ekonómiko (MEO) kier ekstendé un rekordatorio na personanan ku a risibí notifikashon ku nan pèrmit di HORECA òf pèrmit Onshore ta kla, pa pasa buska esaki mas pronto posibel na Lokèt di Pèrmit.

Pa lei Ministerio di Desaroyo Ekonómiko (MEO) ta esun responsabel pa otorgá pèrmitnan ekonómiko na Kòrsou. Den kuadro di esaki, MEO su Departamento di Pèrmitnan Ekonómiko ta evaluá i tuma desishon diariamente riba petishonnan ku keda risibí via di Lokèt di Pèrmit.

Algun di e pèrmitnan ekonómiko aki ta inkluí pèrmitnan Onshore (pèrmit ku ta keda otorgá na kompania ku ta hasi negoshi lokal) i pèrmitnan di HORECA.

Den e 2 kategorianan aki MEO a tuma nota ku tin diferente pèrmit aprobá kual e petishonario ainda no a akudí pa tuma esaki na Lokèt di Pèrmit.

MEO kier hasi un último apelashon na tur persona ku a hasi petishon pa un permit di Onshore òf di HORECA i ku ya a risibí notifikashon ku su pèrmit ta kla, pa pasa tuma esaki mas pronto ku ta posibel.
Tur pèrmit ku ta kla por wòrdu tumá na Lokèt di Pèrmit situá na Saliña 127 (Eurobuilding Unit 3-8) pegá ku Subway òf por yama pa mas informashon na 433-3100.

Nos Ministerio a sòru di publiká e respektivo listanan di pèrmit aki tantu riba wèpsait di gobièrnu.cw (klek riba nòmber di nos ministerio i habri e listanan bou di e título di ‘último notisianan’) komo tambe riba Facebook di Ministerio di Desaroyo Ekonómiko.
Tur persona ku tin un pèrmit di Onshore òf HORECA pendiente, por fabor chek e listanan ku a keda publiká riba nos página di Facebook i tambe riba e wèpsait di Gobièrnu i akudí mas pronto ku ta posibel na Loke di Pèrmit si akaso bo negoshi ta aparesé riba un di e listanan. Despues di djabièrnè 11 di yanüari 2019 tur pèrmit ku no a wòrdu buska lo keda revoká i e petishonario lo mester entrega un petishon nobo si akaso ainda tin mester di e pèrmit.

error: Content is protected !!