SDKK a entregá 500 pal’i funchi den kuadro di Dia internashonal di Mucha

SDKK a entregá 500 pal’i funchi den kuadro di Dia internashonal di Mucha

 

Willemstad – SDKK a wòrdu aserká pa partisipá den un proyekto kaminda lo a traha pal’i funchi pa entrega na muchanan riba dia 20 di novèmber último, ku a wòrdu nominá komo Dia Internashonal di Derechonan di Mucha. Derechonan di mucha ta stipulá den e tratado internashonal di Derechonan di Mucha i a keda ratifiká den Reino na aña 1995. Den kuadro di esaki SDKK, ku ta i tin ku promové, lasonan familiar entre e klientenan i nan famianan durante di nan detenshon, ta sinti nos mes obligá pa pone atenshon na e dia aki.Esaki ta nifiká ku mundialmente, asta den SDKK, nos ke pa nos tata- i mamanan ku ta detené, para ketu na derechonan di nos muchanan, nan yunan.

E motibu ku Tim di Maneho di SDKKJ a bai di akuerdo pa partisipá na e proyekto aki tabatin diferente motibu. Na promé lugá, nos ke pa nos klientenan tambe para ketu i reflehá riba e balor ku nan ta dunando aktualmente na e derechonan di nan yunan durante di nan detenshon. Na di dos lugá, SDKK, konforme e vishon di gobièrnu di Kòrsou tambe ta obligá pa yuda krea un komunidat bon desaroyá, bon formá i eduká. Sigur na momentu ku un persona kua violá nos leinan vigente wòrdu detené den un instituto di korekshon, SDKK ta sintié obligá pa sigui forma e persona aki pa e sali despues komo un mihó hende, es desir un hende mas responsabel pa su aktonan. Un hende ku por pensa, aktua na un forma positivo pa asina e por ta un mihó ròl modèl pa su yunan. Meskos ku nos Minister di Enseñansa, Siensia, Kultura i Deporte, sra. Marilyn Alcalá-Wallé, a bisa dia 20 di novèmber último: SDKK tin e obligashon i responsabilidat pa durante di e detenshon di e klientenan ku wòrdu poné bou di su guia, pa sòru pa tur kliente, haña e oportunidat pa yega na nan derechi pa saka e máksimo potensial for di nan mes. Yunan di nos klientenan den SDKK, tambe ta nos muchanan, nan tambe ta nos base, nan tambe ta nos futuro. Hopi biaha nos no ta para ketu na e bida ku yunan, di personanan ku ta detené, ta pasa den dje. Importante ta pa nos empoderá e mayornan aki durante di nan detenshon pa sigui duna aporte na e desaroyo i edukashon di nan yunan. Na di tres lugá, e kliente por gana sèn i asina aportá na kompra di su produktonan di primera nesesidat, sin ku e tin ku pidi su famia(nan) sèn. Na di kuater lugá e kliente ta haña e oportunidat di sali for di su blòk i distraí su mente i fokus riba algu positivo. Na di sinku lugá, e kliente ta haña e posibilidat pa desaroyá su mes. Na di seis lugá e kliente ta kontribuí na e ekonomia di Kòrsou ku su produkto. Na di shete lugá e kliente ta haña e oportunidat na momentu ku e ta traha e pal’i funchi e ta aportá na algu pa nos futuro generashonnan. Ku esaki SDKK su maneho, ku ta dirigí riba krea empatia di parti di e kliente pa otronan ku e a yega di hasi daño, mesora ta krea e komprenshon i empatia di komunidat di Kòrsou pa ku nan proseso di resosialisashon. Na di ocho lugá, e kliente ta wòrdu di trein riba su kualidatnan komo un futuro empleado, a base di struktura den ora di trabou, disiplina pa ku bo trabou, rèspèt pa e produkto i bo trabou, étika di trabou i nan balor propio. Na di nuebe lugá, e kliente por siña un abilidat ku por ta e mes no tabata sa ku e tin. Ku por resultá den futuro fishi ku e por gana su entrada kun’e i tambe e por yuda su mes na kas ku kosnan fásil di karpinteria. Finalmente pa e klientenan tabata un bon oportunidat di mustra ku nan ke pa pueblo di Kòrsou mira nan, los di e echo ku nan ta detené den SDKK, komo un grupo di hende ku tambe tin nan potensial i ku ta sigui kere den nan talentonan.

 

 

error: Content is protected !!