Advertisements

NOCHI DI INFORMASHON PA DOÑONAN DI STANDPLAATS PAFÓ DI SIUDAT

NOCHI DI INFORMASHON PA DOÑONAN DI STANDPLAATS PAFÓ DI SIUDAT

 

WILLEMSTAD- Ministerio di Desaroyo Ekonómiko (MEO), na nòmber di Gobièrnu di Kòrsou, a tene un seshon di informashon pa tur doño di pèrmit di standplaats i tur persona ku ta okupá un standplaats pafó di Sentro di Siudat. E Seshon di informashon aki a trata kontenido di e maneho nobo pa okupashon di standplaatsnan ubiká pafó di siudat.

A base di un kambio den e lei di Órden Públiko (LOO, PB 2015 nr. 31) na aña 2015, Minister di Ekonomia a bira esun enkargá ku pèrmitnan di tantu standplaats i vent. E kambio aki a resultá den un dekreto ministerial fechá aprel 2016 (P.B. 2016, nr. 17), i a base di esaki e ministerio a sòru pues for di aprel 2016 pa trese mas strukturá i mihó transparensia ki ora un persona ta bini na remarke pa un pèrmit di standplaats i vent.

A base di e dekreto aki tambe, Ministerio di Desaroyo Ekonómiko konhuntamente ku Ministerio di Tráfiko, Transporte i Desaroyo Úrbano, na nòmber di Gobièrnu di Kòrsou, a bin ta hasi inventarisashon durante e aña aki di tur standplaats eksistente pafó di siudat, adaptá e kriterionan pa otorgashon di standplaatsvergunning nobo i tambe traha riba kontenido di un mihó maneho di standplaats.

Entretantu e maneho nobo pa poseshon di un pèrmit di standplaats permanente pafó di sentro di siudat a keda aprobá resientemente pa Konseho di Minister. Den e maneho aki a palabrá entre otro tokante regulashon di lokalidatnan na unda un standplaats ta permití, e midínan permití pa e standplaats i tambe ta tene kuenta ku mantenshon di órden públiko, trankilidat, seguridat i bienestar di un i tur.

Gobièrnu di Kòrsou ta di opinion ku ta di sumo importansia pa tur doño di pèrmit di standplaats pafó di sentro di siudat i tur persona ku ta hasi uso di un standplaats pafó di sentro di siudat ta bon na altura di e derechi i debernan ku a keda stipulá den e maneho revisá aki. Pa e motibu aki a organisá un Seshon di Informashon djamars dia 11 di desèmber en konekshon ku introdukshon di e Maneho aki. Tur doño di standplaats pafó di sentro di siudat i esnan ku aktualmente ta hasiendo uso di e diferente standplaatsnan eksistente a keda invitá na e anochi informativo aki. Pa tur ku ta interesá, e maneho aki ta disponibel bou di e tab di dokumento riba página di www.gobiernu.cw i tambe riba facebook di Ministerio di Desaroyo Ekonómiko.

 

Advertisements
error: Content is protected !!
%d bloggers like this: