Advertisements

Karta anonimo dirigí pa UTS

Karta anonimo dirigí pa UTS

Apresiabel redakshon di Kiko Ta Pasando, 

Pa medio di e karta aki mi ta dirigí mi mes na UTS riba boso plataforma komo ku personal den nan store nan no por yuda mi, nan personal na call center tampoko i mi sa ku mi mail lo resultá den nan junk mail òf nan lo keda sin les’é. 
Mi ta un fiel kliente di UTS i mi tin kòntrakt di kada bes 2 aña será ku nan pa 2 number di selular for di 10 aña pasá. Ta asina ku kada 2 aña mi ta pasa un UTS store na fin di e temporada di e kòntrakt, mi ta renobá e kòntrakt i risibí 2 telefon nobo. Pa mi sorpresa e aña aki ku mi a bai renobá mi kòntrakt na fin di luna di òktober, a duna mi di konosé ku huntu ku e kòntrakt mi por bin na remarke pa un Samsung Galaxy J7 i S9, pero ku ta J2 so nan tin aktualmente. Mi a warda pa renobá e kòntrakt i un yufrou na e store na Gosieweg a nota tur 2 number ku ta kai bou di e kòntrakt pa e tuma kontakto asina ku e J7 nan yega. Mi tabata bai personal bai puntra tur siman i tur siman ta bisa mi ku e container di J7 no a yega ainda. Grandi tabata mi sorpresa ku dia 23 di novèmber, mi a bin kompronde via un otro kliente ku UTS tabata tin Black Week! I ku tabata tin Samsung Galaxy S9 pa kada kliente ku sera un kòntrakt nobo. Mi a sali bai e store ku tabata mas serka di mi i mi a bin kompronde ku no tin mas S9 pero nan por ofresé mi un Motorola ku ta un telefon ku menos kapasidat (inferior). Na momentu ku mi a reklamá di no tabata sa mas trempan di nan kampaña, apesar di tabata na e store tur siman, e yufrou ta bisa mi ku e propaganda a pasa na televishon. 
Awor, redakshon di Kiko Ta Pasando, for di tempu ku boso ta eksistí, mi ta sigui tur notisia via di boso plataforma pues ami no ta wak e kanalnan lokal na televishon. Pero komo ku mi tabata bai personal na e store di UTS, mi ta di opinion ku por a notifiká mi di e kampaña, sabiendo ku mi ta en espera di telefon J7 i S9 pa por renobá e kòntrakt ku mi tin ku UTS. Mi pregunta ta: ta asina ki ta trata kliente? Of mi tin ku dedusí ku ta miho mi bai sera un kòntrakt na Digicel? 
Kerido redakshon, masha Danki pa e espasio duná na mi persona riba bo plataforma pa mi por a ekspresá mi mes.
Saludo kordial di un fiel siguidó di Kiko Ta Pasando.
Advertisements
error: Content is protected !!
%d bloggers like this: