Advertisements

Walroud (PAR): kontrali na loke supuestamente e ta para p’e Schotte ke hustisia di klase pa su mes

Walroud (PAR): kontrali na loke supuestamente e ta para p’e Schotte ke hustisia di klase pa su mes

 

Ayera den un konferensia di prensa nos por a tuma nota kon e polítiko Gerrit Schotte a bin ku un proposishon pa e bai será te aki tres luna pa e por pasa mas tantu tempu posibel ku su famia i voral ku su yunan. E proposishon aki, ku ta mustra unu simpátiko, en realidat ta nada mas i nada ménos ku un proposishon di hustisia di klase. Ku Schotte, awor ku un kondena final i irevokabel, ke logra loke semper e la hasi i sigur a praktiká den su bida polítiko esta: hanchu p’e komo esun pudiente i smal pa otronan. Awor e kos a bira hanchu  p’e komo kondenado i smal pa sobrá kondenadonan. Anto tur esaki basá riba e ponensia eróneo i manipulativo ku e ta un víktima di un persekushon polítiko.

Nos ta mira un biaha mas ku den kualke sirkunstansia Schotte ta persistí di bin ku su propio reglanan di wega miéntras tantu tur otro hende mester tene nan mes na reglanan di nos sosiedat. Lo ke tambe ta remarkabel ta ku Schotte semper tabata e promé den rei pará pa akusá sierto partidonan i sigur partido PAR di ta praktiká hustisia di klase i awor ku e tin ku e demonstrá ku é si no ta hasié,  nos ta ripará ku den praktiká e ta hasi i eksihí lo kontrario. Ta di kuantu biaha nos por ripará ku ora ‘puntje komt bij paaltje’ e loke Schotte ta bisa no ta loke e ta hasi den práktika?

Es mas. Schotte ke pa ministerio públiko kumpli ku su petishon di apliká hustisia di klase riba dje anto si akaso ministerio públiko no honra su petishon, é mes ke disidí di bai será for di djárason awor ora é disidí di presentá su mes na SDDK. Esaki ta nada mas ku mundu riba su kabes. Kiko lo bin despues? Ku e mester por tin un sel pa su mes ku televishon, telefòn último modelo i kòmpiuter ku internèt? Ku e mester por reuní ku miembronan di su partido den sala di reunion di e direktor di SDDK?

Mi hende ta spera realmente ku Schotte lo sali for di e periodo di prisòn aki komo un hòmber kambiá den tur sentido di palabra. Ku e ta mustra di ta repentí ku e komo e promé promé minister di nos pais Kòrsou a bende nos pais pa un saku di plaka i komo kontra prestashon firmá den un kontrato a duna mafia Italiano akseso den e órganonan di mas importante di nos pais. Repentí di a hinka nos pais for di un ‘gezonde startpositie’ i un surplus di 50 mion riba presupuesto na 101010 den apénas 2 aña den un défisit di 270 mion i risibí un aanwijzing riba kua te ainda nos pueblo ta struggle pa paga e kuenta presentá ku medida doloroso. Repentí di tur a hendenan i profeshonalnan ku sin miserikòrdia a wòrdu mandá kas sin pensa ku nan tambe tin famia i yu chikí pa kria. I esakinan ta djis un par di ehèmpel di tur e kosnan ku Schotte a hasi ku pueblo di Kòrsou den su mundu di ‘ikke ikke ikke en de rest kan stikken’. Tempu sinembargo lo ta e mihó maestro, pero pa awor i sigur den su delaster rueda di prensa lamentablemente nos no a mira niun kambio ainda.

Advertisements
error: Content is protected !!
%d bloggers like this: