Advertisements

Parlamentario Curtley Obispo: Refineria, CRU i RDK huntu pa bienestar di Kòrsou.

Refineria, CRU i RDK huntu pa bienestar di Kòrsou.

Durante e reunion di Komishon Sentral di Parlamento di Kòrsou di dia 3 desèmber 2018, parlamentario Curtley Obispo a trese pa dilanti ku Refineria, CRU (Curaçao Refinery Utilities) i RDK (Refineria di Kòrsou N.V.), tur 3 huntu ta importante pa kuponan di trabou, ekonomia i desaroyo di Kòrsou.  P’esei huntu tin ku sigui lucha i sigui duna e aporte pa asina logra kontinuidat di refineria. Huntu tur aktornan mester sigui hasi tur esfuerso pa operashon di refineria kontinuá, keda i prosperá. Uni forsa huntu pa asina triunfá dor di logra kontinuidat di e refineria di Kòrsou i asina sigurá kuponan di trabou direkto i indirekto pa hopi i hopi aña mas.

A base di e presentashon di RDK den Parlamento di Kòrsou, parlamentario Curtley Obispo ta mira 2 ruta stratégiko importante ku mester realisá, kual ta: (1) mas lihé posibel stabilisá i mantené stabil e kadena di CRU/RDK pa asina por garantisá na refineria e suministro di utilidat di koriente, awa, stòm i airu komprimí i (2) mas lihé posibel den aña 2019 logra firma ku un partner stratégiko pa ku refineria, ku posibilidat di un “early step in” promé ku 31 desèmber 2019.

P’esei ta bon ku den e reunion, Parlamento di Kòrsou i Pueblo di Kòrsou por sigui haña mas informashon i mas klaridat di Gobièrnu di Kòrsou i RDK. Mas informashon i mas klaridat pa ku refineria i tambe e proseso pa por logra firma ku un partner stratégiko riba término largu ku e posibilidat di un “early step in”. Mas klaridat i mas informashon tokante desishonnan ku ta tumando i ta sigui tuma den e kadena di CRU/RDK pa asina stabilisá i mantené stabilidat di e suministro di utilidat pa ku refineria. Un reunion kaminda Gobièrnu di Kòrsou i RDK tin e plataforma pa sigui informá kon kosnan ta kana pa ku futuro di refineria di un forma transparente. I tambe sigui informá i sigui trese klaridat i trankilidat pa nos komunidat i trahadónan di refineria di e pasonan firme ku ta wòrdu tuma pa salbaguardiá kontinuidat di refineria aki na Kòrsou.

Advertisements
error: Content is protected !!
%d bloggers like this: