Advertisements

KTK A KONTINUA KU SU ESFUERSO PA OPERA BOU DI E SIRKUNSTANSIA AKTUAL, VIGILANDO I TUMANDO PASONAN NESESARIO

KTK A KONTINUA KU SU ESFUERSO PA OPERA BOU DI E SIRKUNSTANSIA AKTUAL, VIGILANDO I TUMANDO PASONAN NESESARIO

Willemstad 4 di desèmber 2018- E situashon aktual di poko aktividat di refinashon i tráfiko di barku den sektor petrolero ta sigui influensiá e situashon di Kompania di Tou Kòrsou (KTK.) Debí na e inaktividat den e sektor aki, ku ta representá 80% di e trabounan ku KTK ta realisá den nos hafnan, gerensia di KTK den konsulta ku e sindikato, ku ta representá su empleadonan di KTK, a ofresé un buèlta di retiro boluntario na su empleadonan. Esaki ta parti di e esfuersonan di KTK pa aktivamente enfrentá e retonan ku e kompania ta konfrontá. Banda di esaki, miéntras ta vigilá e desaroyonan rondó di refineria, den estrikto kontakto ku Refineria di Kòrsou (Rdk), ta hasiendo areglonan pa konkretisá un fasilidat finansiero pa por pasa dor di e temporada di krísis aki. Mientrastantu KTK ta sigui buska oportunidatnan pa trabounan nobo den region pafó di Kòrsou. Gerensia di KTK, netamente pa ofresé su empleadonan e oportunidat pa opta pa algu otro, a krea espasio pa su empleadonan por apliká pa retiro boluntario.

Pa KTK, miéntras ku no tin tráfiko di barku, e situashon ta keda meskos. Basá riba informashonnan, Isla no ta dunando 100% seguridat ku e tráfiko di barku, direkshon di nos refineria i Bullenbaai, lo oumentá optimalmente, sigur no pronto. KTK a tuma nota ku ta premirá, ku si tur kos bai bon, pa medio desèmber CRU lo por kuminsá duna stom i koriente na Refineria Isla. Di e forma aki Refineria Isla lo por kuminsá operá i ta di spera ku PDVSA ta reanudá suministro di petroli i konsekuentemente tráfiko den nos haf lo por bolbe oumentá. E trayekto inisiá pa Refineria di Kòrsou, pa selektá un terser partido pa bin asistí Refineria Isla ku e asina yamá ‘Early Step In’, kontrario na loke nos a spera dos luna pasá, lo no kontinuá. Gerensia di KTK tin entendí ku e trayekto pa un futuro operadó despues di 2019 ta kana fruktífero. Den e periodo tras di lomba KTK a keda operá, finansiando pa gran parti ainda e operashon for di su reservanan.

Gerensia, Hunta di Komisario i akshonista di KTK a disidí ku lo  tuma e probabilidat ku pronto lo tin klaridat tokante di un manehadó i operadó apuntá pa refineria di 2020 pa dilanti, komo punto di salida pa tur akshon di KTK. Ta den e kuadro aki mester mira tur esfuerso ku ta keda realisá dor di KTK na e momentunan aki. Gerensia i sindikato ta sigui den kontakto i ta reuní regularmente tokante di e situashon i desaroyo di e trayekto ku ta regardá ahuste di organisashon di KTK pa por enfrentá e retonan konforme e situashon aktual. Gerensia di KTK ta hasi esaki kombiná ku un maneho stringente di gastunan pa por keda kumpli ku tur obligashonnan. Huntu ku esaki gerensia di KTK ta sigui hiba un maneho dirigí pa generá ingresonan for di aktividatnan pafó di Kòrsou.

Advertisements
error: Content is protected !!
%d bloggers like this: