Advertisements

KDP di RdK Prefered Bidden a keda skohe long term i a kaduka buskeda short term

REFINERIA DI KORSOU TA SKOHE E PARTIDO PA SIGUI NEGOSHA KUNE NA KAMINDA PA YEGA NA UN PARTNER PA MANEHA, OPERA I MODERNISA NOS REFINERIA DESPUES DI 2019

Willemstad 3 di desèmber 2018- Refineria di Kòrsou (RdK) resientemente a finalisá e proseso di skrutiná e proposishonnan presentá pa kandidatonan interesá den maneho, operashon i modernisashon di nos refineria ora ku e kontrato aktual di maneho i operashon terminá na 2019.  RdK komo tal a informá e partido selekta i tambe e demas partidonan, ku a entrega proposishon i a pasa den e último fase di skrutinahe pa yega na un partido preferi pa sigui negosha kun’é, di su desishon. Konforme palabrashon ku e partidonan lo inisiá aworaki e proseso di interkambio di informashon ku e partido skohi pa asina yega na un akuerdo di entendimentu pa mas tarda medio yanuari pròksimo.  Den kaso ku no logra un akuerdo lo inisiá un proseso similar ku un di e otro kantidatonan. RdK ta mantené su mes na e palabrashon ku no ta divulgá nòmber di e partidonan, i e partido preferí su nòmber lo wordu divulgá na momentu ku por pasa pa firma un akuerdo di entendimentu.

RdK entretantu ta kanselá e buskeda pa un terser partido ku riba termino korto mester a asistí den pone refineria den operashon. Esaki debí ku entretantu, ku pasamentu di tempu i e kompleksidat di e proposishonnan di termino korto, RdK ta di opinion ku esaki lo no por produsí un solushon realístiko i ku un papel faktibel pa RdK.   

Tur atenshon di RdK aworaki ta riba yega na e akuerdo di intenshon ku e partido selektá pa e proseso di termino largu.  Di otro banda ta hasiendo lo maksimo pa sigui riba e bon kaminda di pone CRU den operashon ya Refineria Isla por bai bèk na su operashon normal atrobe pronto.

RdK na mei 2018 a kuminsá e proseso di búskeda pa partnernan pa tempu kòrtiku i pa tempu largu, ku asistensia di IHS Markit.  Na fin di sèptèmber 2018 a saka pakete di alta kalidat pa partidonan interesá den maneho i operashon nos refineria despues di 2019.  A hiba kombersashon ku esnan ku a demonstrá interes i a selektá , abase di kriterianan bon defini, un grupo di kompania ku tabatin e potenshal pa bira un partner strategiko pa nos refineria den futuro.  E partidonan a haña te ku medio novèmber pa por a entrega un proposishon (non binding proposal). RdK a bolbe hiba kombersashon ku e partidonan aki resientemente i e siman aki a informa ku e ta sigui papia ku un partido ku e meta pa yega na un akuerdo di entendimentu.  Ta spera ku pa mas tarda mei mei di yanuari proksimo lo por sera un akuerdo di entendimentu. Basa riba e akuerdo aki lo sigui negoshá ku e meta pa medio 2019 yega na un kontrato pa maneha, opera i modernisá nos refineria.

Hunta di Komisario a kontinua ku su investigashon inisiá tokante posibel intento di soborno den kuadro di e proseso di lisitashon i ta spera di pronto lo por finalisá esaki.  E investigashon aki sinemberargo no mag stroba e proseso pa sigui ku e proseso pa yega na e futuro partner pa manehá, operá i modernisá nos refineria.

Advertisements
error: Content is protected !!
%d bloggers like this: