Advertisements

Mikrofiansa komo instrumento di inklushon sosial konklushonnan di reunion di eksperto

Mikrofiansa komo instrumento di inklushon sosial konklushonnan di reunion di eksperto

Willemstad – Djabièrnè 16 di novèmber 2018 a tuma lugá e delaster dia di “High level Expert
Meeting: Microlending as an instrument for Financial Inclusion: Self-employment &
Empowerment at Grassroots Levels” organisá pa Ministerio di Desaroyo Sosial, Labor i Bienestar,
Ministerio di Desaroyo Ekonómiko i Korpodeko. Riba e dia final Prof. dr. Gilbert Cijntje a brinda
un key note speach, kaminda ela duna un análisis krítiko di kiko ta Mikro Fiansa i su efektonan.
Resolushonnan di ekspertonan lokal
Despues a toka palabra na un tim di opservadó i eksperto pa proponé algun resolushon pa yuda
fortalesé e proyekto. Unánimemente e públiko presente a aseptá tur resolushon. E tim a konsistí di
Prof. dr. Giblert Cijntje, Prof. dr. Yvonne Sliep, sra. Meyrtha Leetz-Cijntje, dr. Miriela Carolina, drs.
Frank Quirindongo i sr. Randolph Gijsbertha.
Resolushonnan:
Tur resolushon a keda aseptá pa medio di votashon. E promé resolushon ta bisa ku mester bini un
kampaña informativo tokante kiko ta Mikro Finansa versus kiko ta Mikro Fiansa.
E di dos resolushon ta bisa ku mester establesé un komishon miksto ku ta supervisá e proyekto
Mikrofiansa i ta garantisá eksistensia di Mikro Finansa mediante estudionan basá riba evidensia i uso
di datonan sientífiko.
E delaster resolushon ta bisa ku mester bini un estudio sientífiko di e fenómenonan kultural finansiero
manera ‘sam’ den nos poblashon. E estudio aki, ku UoC a aseptá pa ehekutá den sala, mester establesé
si por usa e fenómenonan kultural di nos sosiedat pa brinda nan komo produktonan institushonalisá
na nos poblashon.
Inougurashon di reunion di eksperto na ICUC
Durante e dia anterior, 15 di novèmber, e reunion di eksperto a keda inougurá pa promé minister sr.
Rhuggenaath i minister di SOAW sr. Hensley Koeiman. Den su diskurso, promé minister
Rhuggenaath a enfatisá importansia di mikro empresario pa komunidat di Kòrsou i su ekonomia. Sr.
Koeiman a amplia tokante kon mikro fiansa por yuda apoderá gruponan den un situashon sosial
frágil.
Partisipashon di organisashonnan internashonal
Na e enkuentro a partisipá representantenan di:
– Aruba Development Bank NV: Sr. Frendsel Giel, Managing Director
– Asociación Latinoamericana de Instituciones Financieras del Desarrollo (ALIDE): Sr. Edgardo
Álvarez, Secretario General i Sr. Romy Calderon, Director de Estudios
– Narrative Foundation: prof. dr. Yvonne Sliep, Investigadó
– United Nations Economic Commission for Latin America & the Caribbean (ECLAC): Sra. Diane
Quarless, Director subregional office
Mikrofiansa i su relashon ku Agènda 2030 di Nashonnan Uní
Sra. Quarless di ECLAC den su diskurso a para ketu na e proyekto Mikrofiansa i su efektonan positivo
riba ophetivonan di Sustainable Development Goals number 1, 5 i 8 ku ta eradikashon di pobresa, igualdat di género i inklushon finansiero. Tambe ela enfatisá importansia di kolekshon di dato,
estudionan di viabilidat i planifikashon di case studies pa por midi e impakto sosial i komunitario di e
proyekto.
Interkambio di konosementu ku paisnan di Caribe i Latinoamerikano
Sr Chavez di ALIDE a para ketu na e relashon estrecho entre ALIDE i Korpodeko ku na aña 2017 a
gana un ALIDE Award pa su proyekto Korpodeko Incentive Programs. Sr Chavez a splika ku na 2009
Kòrsou tabata anfitrion di e reunion anual statutario di ALIDE danki na esfuerso di Sr Rhuggenaath i
a ekspresá su deseo pa Kòrsou por bolbe tuma e enkargo di risibí e reunion aki den añanan binidero.
Sr. Calderon a papia di importansia di registrashon i estadístika na fundeshi di e proyekto aki, di
forma ku por midi impakto i kompartí informashon ku sosionan regional.
Despues di e diskursonan a sigui vários seshon di Workshop den kual e ekipo tras di e proyekto a
splika elementonan klave di e proyekto Mikrofiansa.
Minister Koeiman a indiká ku e proyekto Mikrofiansa lo sigui den 2019.

.

.

Advertisements
error: Content is protected !!
%d bloggers like this: