Advertisements

SDKK ta felisitá Bonaire ku nan prizon nobo

SDKK ta felisitá Bonaire ku nan prizon nobo

Geplaatst op 12 Novèmber 2018 dor di Ministerio di Hustisia

WILLEMSTAD— Tim di Maneho di Sentro di Detenshon i Korekshon (SDKK) di kurason ta felisitá nos koleganan di hermana isla Bonaire ku nan prizon nobo, e asina yama Justitieel Inrichting Caribisch Nederland (JICN).

Un prizon nobo ku mester karga tambe e mentalidat nobo bou di e trahadónan pa enfoká riba e reto di mas grandi i alabes esun di mas importante ku ta resosialisashon. Un responsabilidat kompartí, pa kapasitá e trahadó mas tantu ku ta posibel pa asina e instituto por inisiá e proseso ku lo tin ku duna e detenido e posibilidat pa traha na kambio di su komportashon. Un komportashon ku lo mester dun’é un chèns nobo den e komunidat Boneriano òf unda ku e disidí di bai biba den futuro.

Bonaire ta un komunidat chikí, ta p’esei ta esensial pa hasi lo máksimo pa kada un èks detenido, komo hende, wòrdu tumá bèk den komunidat. Pa por logra esaki ta di sumo importansia pa kambia i/òf ahustá e imágen ku e komunidat Boneriano tin di detenidonan. Un imágen, den un komunidat chikí manera esun di Bonaire, por sierto por yuda òf por opstakulisá un aseptashon digno i real di e persona ku ya ta i a kumpli ku su kastigu.

Durante di e apertura diferente invitado a hiba palabra i nan a mustra riba e importansia pa traha huntu den Reino Ulandes. For di komienso di e aña aki, ya kaba e lasonan a wòrdu intensiva pa loke ta trata e parti di resosialisashon. Tabatin interkambio di konosementu, kaminda e trahadó sosial responsabel pa e trayekto aki, sra. Frondaly Martina, a hasi un bishita na e Unidat di Korekshon di SDKK, kaminda e trayekto di resosialisashon tambe ta wòrdu implementá.

E miembronan di Tim di Maneho di SDKK ku tabata presente na e apertura a haña un rekorido den e prizon nobo di Bonaire. Mester bisa ku e lokalidat nobo aki ta duna tur espasio i trankilidat pa reeduká e detenido.

Mester sigui motivá e detenido pa e hasi uso di tur e posibilidatnan di formashon ku ta wòrdu ofresé na dje. Ta esfuersonan ku mester wòrdu hasí konhunto i ku ta sumamente nesesario pa prepará i ekipá e detenidonan pa asina nan por tin un mihó chèns riba un eksistensia balioso i duradero komo siudadano den e komunidat chikí di Bonaire.

Advertisements
error: Content is protected !!
%d bloggers like this: