Advertisements

Pèrmit pa artistanan den fin di aña

Pèrmit pa artistanan den fin di aña

Minister di Hustisia, señor Quincy Girigorie ta mantené e maneho pa ku pèrmit pa artistanan internashonal por presentá na Kòrsou den e periodo di 1 di dezèmber 2018 te ku 6 di mart 2018 igual ku aña pasá. Ta asina ku den e periodo aki konforme artíkulo 47 di Landsverordening Openbare Orde (LOO), no ta duna pèrmit pa artistanan estranhero hasi presentashon. Sinembargo, por hasi un eksepshonnan pa medio di un Desishon Ministerial.
Mirando ku no a yega na un Desishon Ministerial ainda ku ta indiká kualke eksepshon pa ku e maneho anterior, Minister Girigorie ta mantené e maneho di aña pasá en espera di un evaluashon pa ku esaki. Minister a duna instrukshon kaba na tur entidat ku tin de aber ku e tema, pa dun’é informashon nesesario pa asina huntu ku nan i ku Ministerio di Desaroyo Sosial i Trabou, yega na un Desishon Ministerial ku por bai konta pa e añanan benidero.
Maneho pa temporada di fin di aña 2018
E maneho pa e temporada aki ta hasi distinshon entre artistanan ku ta residente di un pais den Reino Hulandes i esnan estranhero. No ta permití ningun artista presentá sin ku tin un pèrmit di evenemento (‘evenementenvergunning’) pa e presentashon konserní. Petishonnan pa pèrmit di evento pa artistanan ku ta siudadano di Reino Hulandes lo keda honrá, basta nan ta kumpli ku reglanan general pa haña e pèrmit aki. Artistanan estranhero, si nan ta kumpli ku lei i reglanan vigente, lo por presentá solamente un biaha durante e periodo aki. Sinembargo esaki ta konta solamente si e promotor no a surpasá e kantidat di kuater biaha durante un aña ku lei (artíkulo 50 insiso 2 di LOO) ta permití pa hasi petishon pa artista estranhero. Den kaso eksepshonal por permití e artista estranhero duna un di dos presentashon. Supervisornan enkargá lo kontrolá di forma skèrpi si esnan ku a haña un pèrmit ta kumpli ku e regla i kondishonnan stipulá. Den kaso ku esaki no ta asina, lo revoká e pèrmit.
Maneho general pa evenemento
E maneho general pa evenemento ta den revishon, esaki lo keda publiká denter di poko tempu i lo drenta na vigor entrante 1 di yanüari 2019. Kaminda ta nesesario lo tene kuenta ku un temporada di transishon. Den e maneho nobo sigur pa evenementonan grandi en todo kaso, lo mester entregá petishon 3 luna delantá i tene kuenta pa tin sufisiente vigilansia di parti di un kompania spesialisá pa mantené órden, pa evitá ku ta hasi uso innesesariamente di servisio di Kuerpo Polisial.
Kondishonnan pa mantenshon di órden públiko tambe lo wòrdu kontrolá muchu mas skèrpi. Tur esaki pa asina garantisá trankilidat i seguridat tantu pa esun ku ta asistí na e evenemento komo esun ku no ta parti di dje.

 

Advertisements
error: Content is protected !!
%d bloggers like this: