Advertisements

Minister Steven Martina ku su bishita Puerto Rico.

Durante di e siman tras di lomba, Minister Steven Martina huntu ku gerensia di Curacao Port Authority (CPA), a partisipá na e di 25 kongreso anual krusero i show komersial di  ‘’Florida Caribbean Cruise Association’’ (FCCA ), ku a tuma lugá na Puerto Rico resientemente.
Durante di e bishita aki Minister Martina huntu ku e delegashon di CPA a risibí hopi informashon importante  i balioso tokante di desaroyonan di e industria krusero den Karibe, ku apesar di su retonan di orkan ku aña pasá a asotá algun destinashon importante, manera Puerto Rico i Sint Maarten, a sabi di keda tòg un region sumamente gustá bou di e turistanan krusero.
Tambe e delegashon a risibí e informashon ku tin aproksimadamente 33 barku krusero di tamaño mas grandi ku ta den proseso di konstrukshon pa e mundu krusero,  ku lo sirbi e área di Karibe tambe kaminda Kòrsou lo forma parti di e ampliashon di e itinerario di e diferente liñanan krusero. Esaki a bira posibel dor ku e segundo Mega Pier Tula a keda inougurá na final di 2017 kaminda Kòrsou por risibí awor e mega kruseronan aki tambe.
Minister Martina huntu ku gerente di CPA  tambe a hasi uso di e oportunidat, pa hiba kombersashon ku e diferente liñanan krusero, entre otro Carnival Cruise Line, Royal Caribbean Cruise Line i Norwegian Cruise Line. E liñanan krusero aki a informá nos ku Kòrsou ta skor hopi bon den nan análisisnan. Tambe nan a duna diferente rekomendashonnan kon Kòrsou por mantené i mehorá su produkto pa e turistanan krusero dor di hasi esaki aun mas interesante i úniko.
Otro aktividat ku Minister i su delegashon a partisipá na dje ta entre otro “Head of State Forum” huntu ku diferente alto funshonarionan, mandatarionan, manera Promé Ministernan i Ministernan di Turismo i/òf Desaroyo Ekonómiko di e region di Karibe i tambe dirigentenan di FCCA kaminda nan  a keda informá di e delaster desaroyonan i strategianan pa laga e merkado di Karibe sigui krese.
Durante di e bishita na Puerto Rico a hiba tambe e promé kòmbersashonnan pa sondia e posibilidat pa yunan di Kòrsou, despues ku nan sigui un programa di preparashon speshal, por logra haña un trabou abordo serka e diferente liñanan krusero ku prinsipalmente ta operá den Karibe.
Resumiendo nos por bisa ku Kòrsou lo sigui pa dilanti di un forma inovativo pa posishoná su mes komo un destinashon di preferensha pa e turistanan krusero pa asina nos logra yega na e meta di 1 mion turista krusero anual den e próksimo 2 añanan. Nos lo sigui ku e preparashonnan pa krea kuponan di trabou nobo pa nos hendenan riba e diferente barkunan krusero ku prinsipalmente lo bishitá e puerto di Kòrsou.

.

. .

. .

. .

. .

.

 

Advertisements
error: Content is protected !!
%d bloggers like this: