Advertisements

AR-Jeser El Ayoubi-komunikado: Nos leinan ta muchu “lief”pa atendé abusu i violensia di mucha!

Parlamentario Jeser El Ayoubi (PAR):

Nos leinan ta muchu “lief”pa atendé abusu i violensia di mucha!

Kastigunan drástiko pa aktonan drástiko mester keda implementá!

 

‘Hopi repugnante i degenerante pa mira via di medionan sosial kon nos propio yu di tera kibrando ku tur moral den un forma apnormal i abusivo kontra di un mucha inosente.’

Parlamentario sr. El Ayoubi ta lamentá ku e akto aki ta ilustrá un biaha mas den ki grado di konsenshi  i rèspèt nos ta bibando aden awendia na Kòrsou. Ta hopi kaso tin kaminda nos muchanan ta bira víktima di sea abusu seksual i violensia sigur mirando bèk e diferente kasonan ku a keda tratá den korte últimamente ku a keda ampliamente kubri den medionan di komunikashon.

Tin un diferensia hopi grandi den sentimentu i persepshon ora bo tende of lesa di abusu seksual ku a tuma lugá afó ku ora bo mira imágen di akto di abusu seksual den bo mes pais sr. El Ayoubi ta sigui bisa. Tur ta kondenabel sin mas pero e impakto di un akto apnormal lokal ta inmensamente mas grandi ku ta influensiá bo propio sentimentu  pero alabes mester konstatá ku tin un situashon horibel pa atendé ku ne i ku esaki no por sosodé di e maneranan usual. Sr. El Ayoubi ke sa kon ta sigui atendé ku e hóben inosente aki? Kiko ta hasi pa e famia ku ta keda impaktá i afektá? Kon ta trankilisá e komunidat asiátiko ku e mucha aki ta forma parti di dje? Te na unda nos ta komprondé nan doló i frustrashon anto esaki sin menshoná e impakto i konsekuensianan di e andanada di atrako ku a tuma lugá i ta tumando lugá riba nan?

Aktualmente hopi hende ta vosiverando nan opinion riba e akto inmoral i apnormal aki ku a laga un smak amargo atras.

Awe ta toka turno na nos pa otronan share e grabashon devastador aki rònt mundu ku alabes ta krea un impakto negativo pa Kòrsou i tachando nos moral siudadano.

Tur delito tin nan grado di gravedat i realidat ta ku lamentablemente nos leinan “lief” ta  permití tur tipo di delinkuente pa hasi uso di e mesun estado di derechi pa despues tòg  bolbe kometé e mesun delito sin tene kuenta ku niun víktima ni e konsekuensianan di esaki.

Ki ora derechinan humano ta konta pa e víktima? E derechinan humano di e perpetuando ta bal mas ku esnan di e víktima?

Kastigunan drástiko pa aktonan drástiko mester keda implementá ku e meta pa antisosialnan pensa 2 biaha promé ku kometé un fechoria sea kua sea esaki ta sr. El Ayoubi ta sigui bisa.

Un maneho adaptá na nos kultura ku leinan ku ta kuadra ku e situashon aktual pa ku protekshon di nos muchanan, nos grandinan i nos sosiedat en general kontra tur tipo di abusu i violensia riba nos isla.

Komo Parlamentario nos ta determiná pa huntu ku profeshonalnan riba e area aki evaluá e leinan vigente i eventualmente atendé esaki di un forma ofisial den Parlamento.

Advertisements
error: Content is protected !!
%d bloggers like this: