Advertisements

Parlamentario Curtley Obispo: Kámara di Presupuesto Kòrsou (“Begrotingskamer Curaçao”)

Minister di Finansa  

Señor Kenneth Gijsbertha

Pietermaai #17/Pietermaai 4-4A

 

Djaluna, 5 novèmber 2018

 

Tópiko: Kámara di Presupuesto Kòrsou (“Begrotingskamer Curaçao”)

Apresiabel señor Minister Kenneth Gijsbertha,

Den kuadro di Pais Kòrsou su finansa públiko, lo ta bon tambe pa entre otro ankra den leinan di Pais Kòrsou un órgano pa supervishon finansiero; e asina yama Kámara di Presupuesto di Kòrsou.  E Kámara di Presupuesto di Kòrsou mester yuda i permití Kòrsou mantené un finansa públiko saludabel, sostenibel i duradero.

E Kámara di Presupuesto di Kòrsou tin mas ku 7 aña kaba riba agènda di Gobièrnu nan di Kòrsou i di Parlamento di Kòrsou na turno, aki mi ta referí na entre otro e 2 aneksonan na e karta aki i e Akuerdo di Gobernashon di Kòrsou 2017-2021. Tambe tabata tin un reunion di Komishon di Finansa di 15 aprel 2014 kaminda a deliberá ku e Minister di Finansa di e tempu ei, enkuanto e konsepto di lei “Ontwerplands-verordening tot instelling van de begrotingskamer”.  Despues, dia 15 sèptèmber 2014 Minister di Finansa di e tempu ei den un karta na Parlamento di Kòrsou a mustra ku tin un trayekto ku lo sigui kana pa loke ta e konsepto di lei ariba menshoná.

A base di e echonan ariba menshoná mi ta aserka Minister Gijsbertha ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 96 di Reglamentu di Orden di Parlamento di Kòrsou:

  1. A sigui traha te ku 22 desèmber 2016, riba e promé konsepto di lei di Kámara di presupuesto di Kòrsou ku fecha 18 febrüari 2014 ? Unda e konsepto di lei di di Kámara di Presupuesto a keda pega den e aparato gubernamental ?
  2. Un di e metanan di e periodo di gobernashon 2017-2021 ta pa instituí un Kámara di Presupuesto di Kòrsou. Kon leu ta ku un konsepto di lei di e Kámara di Presupuesto?. A hasi uso di e konsepto di di lei di Kámara di presupuesto di Kòrsou ku fecha 18 febrüari 2014?
  3. Kua ta e planifikashon di tempu pa yega na e Kámara di Presupuesto di Kòrsou pa loke a sobra di e periodo di gobernashon 2017-2021?.

 

Atentamente,

 

Curtley Obispo

Parlamentario pa Kòrsou

PAR

 

Aneksonan:

  1. Moshon aprobá di Parlamento di Kòrsou di dia 29 sèptèmber 2011 pa instituí un Kámara di Presupuesto di Kòrsou;
  2. Karta di Minister di Finansa señor Dr. J.M.N. Jardim na Presidente di Parlamento di Kòrsou señor M.C.F. Franco fecha 18 febrüari 2014.

Advertisements
%d bloggers like this: