Advertisements

Fundashon SIGE ta sera aña 2018 ku: Otro Siklo eksitoso di Stimulashon Trempan den Bario

Fundashon SIGE ta sera aña 2018 ku:
Otro Siklo eksitoso di Stimulashon Trempan den Bario

Willemstad – Djaweps 25 di òktober último Sentro pa Inovashon i Guia Edukashonal (SIGE) a parti sertifikado na tur partisipante ku a finalisá e 4 seshonnan di Siklo di Informashon Aminta Sprockel “Stimulashon Trempan den Bario” ku éksito. E siklo a konta ku partisipashon di 41 partisipante aktivo i dinámiko ku semanalmente a partisipá na e 4 seshonnnan tur djaweps anochi na Sentro di bario Janwe. Por a nota ku partisipantenan tabatin hopi smak pa siña tokante tur e tópikonan ku Fundashon SIGE a trata pa ku edukashon di muchanan di 0 pa 4 aña. E grupo di partisipantenan a konsistí di tantu mayor komo edukadó profeshonal femenino i maskulino.  

E biaha aki SIGE tabata tin 3 oradó profeshonal kual tabata sr. Drs. Rodney Stewart, neurosikológo, sra. Daisy Gijsbertha kende ta O&G verpleegkundige i sr. Drs. Atticus Wederfoort, dòkter di konsultorio, kual a perkurá pa kubri e teoria básiko di e temanan “Baby Brein”, “E proseso di relashon estrecho”, “Stima òf Malkriá?” i “Importansia di konsultorio di 0 pa 4 aña”. Banda di teoria e partisipantenan a kubri e parti práktiko tambe dor di hasi diferente tarea den grupo. Algu interesante ku e profeshonalnan di SIGE ta eksperensiá kada bes di nobo durante e seshonnan aki ta ku nan mes tambe ta finalisá e tandanan ku konosementu nobo ku nan por uza diariamente den nan trabou, pues ku ambos partido ta siña di otro.

Esaki ta un di e tantisimo formanan ku Fundashon SIGE ta dunando su granito na desaroyo di nos dushi Kòrsou, invertiendo amor, konosementu i sabiduria atkerí den edukashon di nos muchanan, kende ta e futuro di mayan. Personanan ku no a logra partisipá pa un òf otro motibu por inskribí otro aña pa ripitishon di e tanda. Mas informashon tokante esaki lo sigui despues.

Pa informashon general por tuma kontakto ku Fundashon SIGE na numbernan di telefòn 747-2700 i 738-6570, òf subi nos wèpsait www.sige.cw. Por bishitá tambe e Facebook SIGE Curaçao.

 

Advertisements
%d bloggers like this: