Advertisements

“Abilidat di lesa ta kai i lanta ku práktika i mas práktika” SIGE su seri di charla Plaser den Lesamentu a surpasá tur espektativa!

“Abilidat di lesa ta kai i lanta ku práktika i mas práktika”
SIGE su seri di charla Plaser den Lesamentu a surpasá tur espektativa!

Willemstad – Siman pasá Fundashon SIGE (Sentro pa Inovashon i Guia Edukashonal) a klousurá su seri di charla titulá “Plaser den Lesamentu”. E seri tabata speshalmente dirigí na mayornan i edukadónan i a trata tópikonan interesante manera desaroyo di lesamentu, problema ku lesamentu i e importansia di AVI/AFI.  SIGE ta sumamente satisfecho di por a konta ku partisipashon di mas o ménos 200 mayor i edukadó profeshonal. Tur a partisipá di forma aktivo i a aploudí e echo ku SIGE ta dunando atenshon na e importansia di lesamentu. SIGE ta mira bèk riba dos luna di charla eksitoso ku a surpasá tur espektativa i semper lo sigui hasi tur loke ta posibel pa promové i stimulá plaser den lesamentu.

E seri tabatin un durashon di dos luna i a trata kuater diferente tópiko. Den luna di sèptèmber SIGE a ranka sali ku e promé tópikonan, kual tabata “Desaroyo di Lesamentu” presentá dor di sra. drs. Ivette Hato i e di dos tópiko kual tabata “Problema den lesamentu” presentá dor di sra. Lucille Hernandez-Jessurun. Seguidamente durante luna di òktober sra. Aishel Statie a trata e tópiko “Kon lesa pa mi yu?” i despues sra. Lucille Hernandez-Jessurun a klousurá e seri ku e tópiko Importansia di AVI/AFI.

Presentenan por a skucha entre otro di e influensia ku uzo di ‘tablet’ tin riba e imaginashon i fantasia di un mucha, i ku e no ta salú pa un mucha ta pasa oranan largu ta wak pantaya di sea ‘tablet’, telefòn òf televishon. Siensia ta mustra ku un mucha su edat partí den dos ta e kantidat di ora ku e por pasa ta wak un pantaya (sea ‘tablet’, telefòn òf televishon) pa dia. Fuera di e echo ku e ta afektá e mucha su wowo for di chikí, e ta afektá su interes den lesamentu di buki tambe.

Esaki ta un di e tantísimo formanan ku Fundashon SIGE ta dunando su granito na desaroyo di nos dushi Kòrsou, invertiendo amor, konosementu i sabiduria atkerí den edukashon di nos muchanan, kende ta e futuro di mayan. Na luna di novèmber SIGE lo lansa su siguiente proyekto ku ta Kashi di Buki den Sambil, esaki tambe ku e meta pa stimulá plaser den lesamentu.

Pa mas informashon por tuma kontakto ku Fundashon SIGE na numbernan di telefòn 747-2700 i 738-6570, òf subi nos wèpsait www.sige.cw. Tambe por bishitá Facebook Sige Curaçao.

Advertisements
error: Content is protected !!
%d bloggers like this: