Advertisements

Riba presupuesto 2018 tin sèn pa drecha kamindanan i mester usa esaki

Riba presupuesto 2018 tin sèn pa drecha kamindanan i mester usa esaki

 

Willemstad – Trabounan di restrukturashon di kareteranan ku ta planiá pa 2018 mester tuma lugá pasobra nan tin prioridat i mester evitá ku e fondonan destiná den presupuesto di 2018  pa esaki, ta bai pèrdí.

Minister di Tráfiko, Transporte i Planifikashon Urbano sra. Zita Jesus Leito ta lamentá e molèster ku rekonstrukshon di parti di Santa Rosaweg ta kousando i ta pidi komprenshon pa esaki. Ta trata aki di un fase mas pa rekonstrukshon kompletu di Sta Rosaweg. E parti aktual ta kore di Kaya Kolonchi te ku Apollostraat.

Entre tantu, a yega djabièrne último na un mihó solushon pa desviá e tráfiko riba e kaminda na banda pa e trabounan por a sigui. Ademas en general Servisio pa Obra Públiko (OW) lo traha ku tur kontratista envolví den e proyektonan di drecha kareteranan pa por hasi e tempu ku ta traha riba kareteranan mas kòrtiku posibel pa evitá molèster mas tantu posibel. Por ehèmpel riba e proyekto di Santa Rosaweg lo hasi e trabou den ménos tempu, esta di 4 siman enbes di 6 siman.

A konsiderá tambe e posibilidat pa wak si por a traha riba otro kareteranan ménos frekuentá ku mester wòrdu drechá, pero no ta posibel pa e echo ku no a bini un destaho públiko pa e kamindanan ei i un destaho nobo ta tuma su tempu. Ta pa e motibu aki tambe, trabounan tin ku sigui.

OW ta planifiká restrukturashon di kareteranan lunanan adelantá. Den e planifikashon aki, i a base di un análisis di e estado di e kareteranan, ta skohe kua tin priodidat. Ora ku disidí riba esaki ta kuminsa kana e proseso di destaho públiko i asina ku skohe e kontratista ku lo hasi e trabou, ta kuminsa e kombersashonan. OW  huntu ku kontratisanan i Kuerpo polisial ta planifiká e kambionan di ruta i atendé ku pèrmitnan nesesario.

E aña aki e proseso aki a tuma lugá, pero dor di e reto finansiero, e trabounan a enkontrá un retraso i ta awor aki pa fin di aña por hasi e trabounan. E fondonan tei riba presupuesto di 2018 i no ta pasa outomatikamente pa presupuesto di 2019.

Minister Jesus-Leito ta pidi komprenshon pa e inkombinensia ku e restrukturashonnan por kousa den e simanan benidero. Lo hasi tur posibel pa minimalisá e molèster. Alabes konforme e informashon ku Minister Jesus-Leito a duna for sèptèmber tokante di esaki den e próksimo simanan lo kuminsá tambe riba varios otro kareteranan, entre otro e siman benidero riba JB Gorsiraweg, ku ta e karetera ku ta pasa dilanti di Kasa Kuna, ENNIA i Embahada Merikano.

Advertisements
%d bloggers like this: