Advertisements

Parlamentario Curtley Obispo: proyekto di deklarashon riba violensha i akoso polítiko kontra di hende muhé.

Proyekto di deklarashon riba violensha i akoso polítiko kontra di hende muhé.

Durante dianan 25  i 26 di òktober 2018, parlamentario Curtley Obispo a asistí na Siudat di Panamá, Panamá, na e reunion di e komishon di Equidad di Genero, Niñez i Juventud di Parlatino. E plataforma interparlamentario forma pa e 23 paisnan di Latino Amérika i Karibe tin su balor agregá i e biaha aki tabata tin e oportunidat di interkambiá di konosementu ku un organismo internashonal i un kolega parlamentario riba e tópiko di kombatí akoso i violensia polítiko kontra e hende muhé den Latino Amérika i Karibe. Un presentashon i interkambio balioso ku señora Paula Narváez, asesorá spesialista den partisipashon di hende muhé pa Latino Amérika i di Karibe di ONU Mujeres Panamá. Ta di menshoná tambe ku señora Paula Narváez durante e periodo 11 mart 2014 te ku yüli 2014 a okupá e puesto di Jefa de Gabinete del Palacio de la Moneda de Gobierno de Chile. Durante e periodo 18 novèmber 2016 te ku 11 di mart 2018 e la okupá e puesto di Ministra Secretaria General de Gobierno de Chile. Diputada Benita Díaz di Bolivia, presidente di e Comisión de Pueblos Indígenas y Etnias di Parlatino tambe a duna un presentashon di e eksperensia di Bolivia den relashon ku partisipashon di polítiko di e hende muhé na Bolivia.

Despues di e 2 presentashonnan den komishon nos a sigui trata i analisá den un seshon nan di trabou, un proyekto di deklarashon riba violensha i akoso polítiko kontra di e hende muhé. A traha riba e proyekto di deklarashon durante e dos dianan ariba menshoná e komishon a yega na un deklarashon final kua lo bai pa direktiva di Parlatino pa aprobashon i publikashon. E deklarashon tabata tin e siguiente puntonan: (1) pa impulsa e avanse sistemátiko di konosementu riba e realidat regional di violensia i akoso polítiko ku e hende muhé ta sufri, (2) sensibilisa e aktornan regional desde Parlatino den kuadro di e problema di violensia y akoso polítiko di e hende muhé i indiká ku esaki ta un violashon di nan ehersisio polítiko; (3) sugerí e desaroyo di mekanismonan nashonal i regional den kuadro di identifikashon, análisis i siguimentu di denunsianan di violensia i akoso polítiko kontra e hende muhé; (4) promové medidanan kontinente pa sanshoná i eradiká e violensha i akoso polítiko kontra e hende muhé  i (5) organisá un foro regional huntu ku e ofisina regional di ONU Mujeres pa diskutí e tópikonan ariba menshoná.

Advertisements
%d bloggers like this: