Advertisements

Parlamentario Curtley Obispo: Evaluashon di e Lei di Reino di Supervishon Finansiero Kòrsou i Sint Maarten

Evaluashon di e Lei di Reino di Supervishon Finansiero Kòrsou i Sint Maarten

Konforme artíkulo 33 di e Lei di Reino ku ta regla supervishon finansiero di Paisnan Kòrsou i Sint Maarten a bolbe instalá e aña aki un komishon di evaluashon konsistiendo di un total di 4 miembro di Kòrsou, Sint Maarten i Hulanda. E komishon di evaluashon a kuminsá promé di òktober ku nan trabou di evaluashon.  Den e kuadro aki riba djaweps 8 novèmber 2018, e komishon lo ta presente den un Komishon fiho di Finansa di Parlamento di Kòrsou pa deliberá ku parlamentarionan presente. Parlamentario Curtley Obispo ta di opinion ku ta super importante i hopi bon ku e komishon aki ta deliberá ku Parlamento di Kòrsou. Den e reunion aki e por trese puntonan di bista, preguntanan i tambe sugerensianan den kuadro di e evaluashon pa despues haña rekomendashonnan pa asina sa : (1) kon leu Pais Kòrsou a avansá den kuadro di ehekushon di e Lei di Supervishon Finansiero i (2) kua ta e aspektonan ku Pais Kòrsou mester sigui mehorá pa asina yega na un finansa publiko saludabel i sostenibel na bienestar i progreso di Pueblo di Kòrsou. Sigui konstruí i asina yega na e máksimo potensial di Kòrsou pa loke ta finansa publiko saludabel i sostenibel.

E último evaluashon a tuma lugá den aña 2015 i riba 23 yüli 2015 e tempu ei a presentá un rapòrt di evaluashon ku diferente rekomendashonnan balioso. Pa parlamentario Curtley Obispo mester evaluá i sa kua ta e “follow up” nan konkreto ku Gobièrnunan anterior a duna pa loke ta e rekomendashonnan di aña 2015. Sigur den kuadro di  kumplimentu di nos propio leinan di Pais Kòrsou manera: (a) artíkulonan 85, 86 i 87 di Areglo di Estado di Kòrsou, (b) artíkulonan di e lei di Komptabilidat 2010 di Pais Kòrsou i (c) e Lei ku ta regla e Sistema di Kontabilidat (financieel beheer) 2015 di Pais Kòrsou. Parlamentario Curtley Obispo ta mustra atrobe riba e importansia i e seriedat pa tur aña di nobo trata  konforme leinan i tur reglanan establesé di Pais Kòrsou for di 10 òktober 2010: (1) e tratamentu di presupuesto, (2) e ehekushon di presupuesto i (3) e dunamentu di kuenta rason na tempu di presupuesto.

Ora wak patras e promé 4 aña, 3 luna i 22 dia di Pais Kòrsou lamentablemente mester konstatá ku a base di opinion nan (“accountantsverklaringnan”)  di SOAB i Kontrolaria General di Kòrsou ku no tabata tin balanse entre presupuesto, ehekushon di presupuesto i dunamentu di kuenta rason di presupuesto na tempu via kuentanan anual di Pais Kòrsou.  E hechonan aki i e realidat ku Pais Kòrsou te ainda no a sera e siklo presupuestario 2014 i 2015 ku kuentanan anual, tambe ta importante pa evaluá i sa kua ta e “follow up” konkreto ku Gobièrnunan anterior  a duna na rekomendashonnan di aña 2015.

Advertisements
error: Content is protected !!
%d bloggers like this: