Advertisements

Ministerio GMN ta suspendé por lo pronto tur importashon di karni for di Colombia

Ministerio GMN ta suspendé por lo pronto tur importashon di karni for di Colombia


Willemstad – Pa motibu di dos brote resien (29-9-2018 i 10-10-2018) di Fiebre Aphtosa (FA) na Colombia pa kual e pais a pèrdè su status di ta liber di FA, medidanan  di prekoushon a keda aktivá di nobo serka e diferente instanshanan riba instrukshon di Departamentu di Asuntunan Veterinario di Ministerio di GMN. Esei ta enserá pues ku por lo pronto lo suspendé tur importashon di karni for di Colombia. Alabes ta urgí pasaheronan ku ta biaha di Colombia pa nos pais, pa no trese ningun produkto di orígen di karni pa asina no pone salú di nos animalnan na peliger.

FA ta un malesa sumamente kontagioso ku ta endémiko na hopi pais rònt mundu i ku ta afektá animal ku hoef di split manera baka, porko, karné i kabritu. E síntomanan ta konsistí di aparensha di blar na pata, boka i pechu di e bestianan, hipersalivashon, pèrdida di apetit i produkshon di lechi i te hasta morto serka animalnan yòn afektá. E impakto ekonómiko por ta hopi grandi (Inglatera 2001, 14 bion USD), p’esei hopi pais ta kombatí e malesa aki rigorosamente sea sin òf ku vakunashon. E transmishon ta tuma lugá mediante kontakto direkto òf indirekto (via sushi, líkidonan korporal, artefaktonan, hooi) ku animalnan afektá. E karni di e animalnan aki tambe ta kontagioso.

Pa humano e malesa no ta forma ningun peliger pa salú.

Si a kaso kriadónan di animal tin kualkier prekupashon òf ta deseá informashon tokante e malesa di FA por yama 461 4000 òf manda un e- mail na info.uovz@gobiernu.cw.  

 

Advertisements
%d bloggers like this: