Advertisements

Parlamentario Curtley Obispo: Mester bin mas klaridat i mas informashon pa loke ta e edifisio SOAW/ Imigrashon den Punda.

Mester bin mas klaridat i mas informashon pa loke ta e edifisio SOAW/ Imigrashon den Punda.

Durante e reunion di komishon sentral di Parlamento di Kòrsou di 23 òktober 2018, parlamentario Curtley Obispo a trese pa dilanti ku mester bini mas informashon riba e maneho general di edifisionan kaminda empleadonan públiko di Pais Kòrsou ta laborá aden. Tambe mas klaridat i mas informashon pa loke ta trata e kaso spesífiko di e edifisio SOAW/Imigrashon den Punda for di dia ku a sera e kontrakt di hür te ku awe. Importante ta pa sa kon e tema di salú i seguridat di e empleadonan publiko laborando na e edifisio ariba menshoná tabata regla bou di e diferente Gobièrnunan di Kòrsou na turno.

Den e reunion aki, parlamentario Curtley Obispo a mustra riba 4 punto di salida masha importante pa loke ta edifisionan ku tin empleado publiko ta laborando aden, kual ta: (1) salú i seguridat di e empleado públiko ta masha importante i na promé lugá, (2) un bon ambiente di trabou ta masha importante pa e empleadonan públiko funshoná, presta aden i duna servisio na pueblo; (3) edifisionan kaminda e empleado públiko ta funshoná mester ta salú i sigur! (4) mester aktua ku determinashon na momento ku konstatá ku edifisionan kaminda e empleado públiko ta laborá no ta salú i sigur.

Parlamentario Curtley Obispo a hasi 6 pregunta general riba maneho, entre otro riba: (1) tin for di 10 òktober 2010 te ku awe un maneho general deliniá riba papel tokante salú i seguridat di e empleado públiko den tur edifisionan ku Pais Kòrsou sea ta hür òf ta di Pais Kòrsou? i (2) tin for di 10 òktober 2010 te ku awe un maneho general deliniá riba papel i liñanan di komunikashon establesé na momento ku konstatá ku un edifisio no ta salú i sigur pa e empleado publiko?. Tambe 27 pregunta spesífiko tokante e edifisio di SOAW/Imigrashon den Punda, preguntanan riba: (a) e edifisio; (b) kehonan di empleadonan publiko i solushonnan struktural korespondiente; (c) Arbo Consult i su ròl de e kaso aki i (d) kon ta sigui garantisá servisio na pueblo.

Parlamentario Curtley Obispo hasi tambe petishon pa Parlamento di Kòrsou risibí diferente dokumentonan di Gobièrnu di Kòrsou pa por sigui analisá i hasi mas preguntanan den e kaso di e edifisio SOAW/Imigrashon den Punda.

 

Advertisements
error: Content is protected !!
%d bloggers like this: