Advertisements

Parlamentario Curtley Obispo: Presupuesto di Pais Kòrsou ta ankra den Areglo di Estado di Pais Kòrsou, nos lei máksimo!

Presupuesto di Pais Kòrsou ta ankra den Areglo di Estado di Pais Kòrsou, nos lei máksimo!.

Parlamentario Curtley Obispo den e reunion di komishon sentral di Parlamento di Kòrsou di dia 29 òktober 2018, a mustra bon kla ku presupuesto di Pais Kòrsou for di 10 òktober 2010 ta ankra den artíkulo 85 insiso 1 te ku 4 i artíkulo 87 di Areglo di Estado di Kòrsou.

Artíkulo 85 insiso 3 i 4 di Areglo di Estado di Pais Kòrsou ta indiká ku for di 10 òktober 2010 anualmente Gobièrnu di Kòrsou mester presentá na Parlamento di Kòrsou, e promé konsepto di presupuesto di Pais Kòrsou den un òf mas proyekto mas tarda riba e di dos djamars di luna di sèptèmber. Tambe for di 10 òktober 2010, anualmente Gobièrnu di Kòrsou mester presentá na Parlamento di Kòrsou un presupuesto balansa di mas aña di Pais Kòrsou. Den kaso di e promé konsepto di presupuesto 2019 di Pais Kòrsou ta entrega tambe e presupuesto balansa pa loke ta trata añanan 2020, 2021 i 2022.

Parlamentario Curtley Obispo a mustra ku artíkulo 85 insiso 1 te ku 2 di Areglo di Estado di Pais Kòrsou for di 10 òktober 2010 ta indiká ku ta fiha presupuesto di entrada i gastu di Pais Kòrsou mediante un ordenansa nashonal (lei). Presupuesto di Pais Kòrsou ta konsistí di 2 parti: (1) un kuenta koriente i (2) un kuenta di kapital. Pues un kuenta koriente di gastunan i entradanan i tambe un kuenta di kapital di gastunan (di invershon) i entradanan. Pa loke loke ta e kuenta koriente ta kubri e gastunan kalkulá riba e kuenta koriente di e presupuesto di un aña presupuestario kompletamente dor di e medionan reserva pa kubri e gastunan ei. Pa loke ta e kuenta di kapital ta kubri e gastunan di invershon kalkulá riba kuenta di kapital dor di e medionan reserva pa kubri e gastunan ei, teniendo kuenta kue (a) e saldo di e kuenta koriente i (b) entradanan ku ta spera di risibí den un aña for di emishon di fiansa. Ta limitá tamaño di fiansa dor di un norma di peso di interes (rentelastnorm) fiha mediante ordenansa nashonal (lei). Tambe den artíkulo 87 di Areglo di Estado di Kòrsou ta indiká ku sera òf garantisá un fiansa na nòmber òf riba kuenta di Pais Kòrsou no ta sosodé si no ta mediante òf pa forsa di ordenansa nashonal (lei) ku ta fiha òf kambia presupuesto di Pais Kòrsou.

Advertisements
error: Content is protected !!
%d bloggers like this: