Advertisements

A HASI PALABRASHONNAN KONKRETO KU BARKUNAN PA KU USO DI SHA CAPRILESKADE

WILLEMSTAD- Ministerio di Desaroyo Ekonómiko (MEO) den estrecho koperashon ku Duana i Havenmeester  a kanalisá mudansa di e barkunan di fruta durante di e fin di siman tras di lomba di moda ku esaki por a kana segun reglanan vigente.

Manera ya ta konosí a inisiá renobashon di e lokalidat na unda e barkunan di fruta tabata situá na Sha Caprileskade na luna di yüni di e aña aki.

Durante fin di siman tras di lomba porfin hopi por a tuma nota ku e barkunan di fruta tabata den proseso di mudansa bèk pa e waf na Sha Capriles.

Regreso di e barkunan pa e waf di Sha Capriles ta nifiká bida i kolo atrobe kantu di e waf pero tambe ta nifiká un komienso nobo pa e merkado flotante ku nos tur a lanta konosé den nos sentro di siudat.
Promé ku e mudansa a tuma lugá a hasi diferente palabrashon ku e usuarionan di e waf a base di e maneho di Gobièrnu pa ku e área aki.
Entre otro a palabrá ku un total máksimo di 8 barku di fruta lo por para na e tonbanknan na Sha Caprileskade i 4 barku di piskadó. Kada barku ta permití di trese un total máksimo di 6 tripulante ku lo laborá na e waf.
Pa yuda mantené e trabounan ku a keda hasí na renobashon di e waf, e usuario no por klaba nada na e tonbanknan nobo manera ántes tabata e kaso. Por usa krat di plèstik dilanti di e tonbank pero esakinan lo mester keda wardá bèk na momentu ku e usuario rùim òp parti atardi.
Aparte di fruta i berdura e barkunan di fruta ta permití pa bende tambe suku klenku, zeta di koko i zeta di awakati, ruku, komino, klabu dushi, blachi di ayaka i hilu pa mara ayaka.
Segun e palabrashonnan nobo aki, kada doño di barku ta enkaminá inmediatamente e proseso pa por atkerí e pèrmitnan nesesario pa por bende su produktonan na e waf.
Mas ku klaro huntu ku e palabrashonnan nobo aki ta keda vigente ku e bendedó mester tin preis di su produktonan visibel i no ta permití pa bende produkto ku personanan ku ta pasa den outo.

Te na e momentunan aki solamente mitar di e kantidat total di e tonbanknan na Sha Caprileskade ta kla. Pues tin 15 tonbank ku ainda lo mester haña mosaiko. Sinembargo a tuma e desishon pa kuminsá ubika e barkunan di fruta den e forma aki teniendo kuenta entre otro ku e echo ku nos ta drentando temporada di ‘high season’ pa e sektor turístiko i ku den e temporada benidero tin diferente aktividat planeá pa e espasio na kleine werf.

Otro palabrashon nobo ta inkluí e echo ku pronto maneho di e merkado flotante lo ta na enkargo di Fundashon Marshe. Aktualmente ta pendiente pa firma e akuerdo riba esaki ku Fundashon Marshe di moda ku e maneho por drenta na vigor.

Tim di inspekshon di MEO a bai kontrolá djaluna 29 di òktober mainta i lo sigui kontrolá regularmente si e barkunan di fruta ta kumpli ku tur e palabrashonnan ku a keda hasi ku nan. Mientrastantu trabounan lo kontinuá pa asina por finalisá e sobra  15 tonbanknan na Sha Caprileskade mas pronto posibel. Na momentu ku tur ta kla lo re-ubiká e barkunan di un forma mas amplio  na e waf i  tambe lo ubiká kunukeronan lokal na 6 di e tonbanknan parti pariba na e waf.

Advertisements
%d bloggers like this: