Advertisements

MP a presenta kultura di salú Otrobanda i Wèstpùnt

MP a presenta kultura di salú Otrobanda i Wèstpùnt

Den kuadro pa konsientisá nos pueblo Movementu Progresivo a kuminsá ku un siklo di charla tokante salú bou di e nòmber “Kultura di salú”. E charlanan aki ta pa hasi nos pueblo mas konsiente di nan salú. Speshalmente den e temporada aki, kaminda hopi hende ta pèrdè trabou, nos mester ta konsiente kon pa keda trankil i no pèrmití strès tuma over i hiba nos salú atras.  Na luna di yüli nos a bishitá bario di Montaña, na luna di ougùstùs e bario di Kraké, na luna di sèptèmber e bario di Otrabanda i dia 21 di òktober 2018 nos a bishitá e bario di Wèstpùnt. Na luna di sèptèmber i tambe djadumingu siman pasá nos a apliá nos charla un tiki mas inkorporando e parti di movementu, esta ehersisio, pa asina nos por konsientisá riba e area aki tambe ku ta sòru pa nos keda salú.  Sra. Dr. Moses i yùfrou Naisha Sintjago tabata esnan ku a elaborá riba e dos temanan ariba menshoná. Sra. Dr. Moses ta promoviendo un kultura distinto pa keda salú. Un kultura saludabel kaminda nos ta kome kumindanan na kas mas kolorido, saludabel i ekonómiko. P.e. nos mester yega na un kultura kaminda salu di kushina(keukenzout) i suku no ta parti mas di nos kustumber di komementu na kas i pafó di kas. Ademas loke nos tin ku bai kustumbrá di hasi ta bebe hopi líkido. Esakinan lo mester ta awa i awa di koko. Bebe un glas di awa kada ora te ku 3’or di atardi. Tambe ta hopi saludabel pa oumentá e bebementu di awa di koko. Durante diálogo di djadumingu pasá na Wèstpùnt, na Kunuku Pachi Cola, e públiko a trese asina tantu punto positivo dilanti ku e enkuentro aki a bira un éksito rotundo. Tur e kantidat di hendenan ku tabata presente a disfrutá di djus di orégano i un sòpi. Ademas habitantenan di e bario i di otro barionan a probechá pa kue preshon i tambe pa nan kontrolá nan peso serka Dr. Mozes. E biaha aki resultadonan tabata hopi bon i esaki a trese un satisfakshon i speransa aún mas grandi ku Movementu Progresivo ta riba e bon kaminda pa konsientisashon di nos pueblo.  Yùfrou Naisha Sintjago a konsientisá presentenan kon importante ta pa hasi ehersisio i ku esaki ta masha fásil pa hasi na kas ku ehersisionan fásil pa tur edat. Yùfrou Naisha Sintjago a duna demostrashon di ehersionan i públiko a haña chèns pa move e kurpa. E anochi tabata unu sumamente informativo i ameno kaminda kada presente por a haña e atenshon pèrsonal ku kada hende tin mester pa por mantené nan salú den gran forma. Nos di Movementu progresivo kier invitá kada pèrsona ku no a bishitá nos “Kultura di salú” ainda pa keda pendiente pa bo (so) tende ta kua ta nos siguiente bario den luna di Novèmber 2018.

Ku un gran deseo pa nos pueblo ta salú, nos ta sigui konsientisá i informá, keda pendiente di nos.

 

 

 

 

Advertisements
error: Content is protected !!
%d bloggers like this: