Advertisements

Keriendo firmemente den e importansia di “Plaser den Lesamentu”: SIGE ta introdusí Kashi di Buki den Sambil

Keriendo firmemente den e importansia di “Plaser den Lesamentu”:
SIGE ta introdusí Kashi di Buki den Sambil

Willemstad – E aña aki Fundashon SIGE (Sentro pa Inovashon i Guia Edukashonal) a selebrá 20 aña di Kompetensia ‘Lesa pa Otro Skucha’ ku e tema Plaser den Lesamentu organisando diferente charla ku ta promové e plaser aki serka muchanan. Pa klousurá e aña i e aktividatnan alrededor di e selebrashon SIGE ta introdusí Kashi di Buki den Sambil. Kuminsando for di 4 di novèmber 2018 tantu grandi i chikí por pasa na ‘Kids Corner’ na Sambil pa sinta lesa buki, bai ku un buki òf trese buki ku otronan tambe por lesa. Ku e Kashi di Buki SIGE ta introdusí un sistema kreativo pa komunidat yega fásil na buki i asina stimulá lesamentu for di trempan serka muchanan di tur edat. SIGE ta konvensí ku tin plaser den lesamentu i ku esaki ta resultá tambe den mihó abilidat por eskrito i abilidat linguístiko serka muchanan.

E Kashi di Buki ta kompletamente liber pa uzo. Si un mucha a gusta un buki i ta deseá di bai kas kuné pa e sigui lesa regularmente e por hasi esaki trankil. Sinembargo, SIGE kier stimulá muchanan i mayornan sí pa krea un kultura kaminda komunidat kompletu ta kompartí e bukinan ku otro. Pues, SIGE ta duna espasio pa tuma buki pero alabes pa lesadónan trese bukinan for di kas pa pone den e kashi di moda ku otronan tambe por lesa. E Kashi di Buki ta pa komunidat di Kòrsou i mayornan i muchanan konhuntamente por yuda kuida e kashi i e bukinan.

En general, kashi di buki no ta un konsepto nobo. Na paisnan manera Merka i Hulanda e ta konosí komo un proyekto avansá pa stimulá lesamentu bou di tur edat. Por haña Kashinan di Buki na hotèlnan, na laman, stashon di bùs i tambe den kashinan riba kaya. Na Kòrsou tambe tin algun sitio ku tin kashinan di buki. SIGE ta sostené Biblioteka Nashonal Kòrsou kompletamente i ta apoyá un i tur pa sigui bai einan ya ku ei tin un kolekshon muchu mas grandi di buki.

Palabranan di gradisimentu i apresio ta bai na staf i personal di Sambil, kende a brasa e proyekto aki ku hopi entusiasmo i krea espasio den Kidscorner pa e Kashi di Buki.


Sentro pa Inovashon i Guia Edukashonal (SIGE)
SIGE ta duna sosten na tur aktor den e vèlt di enseñansa i edukashon pa por alkansá optimalisashon i inovashon. SIGE ta kumpli ku e tarea aki dor di konsehá, guia, sostené i duna treinen pa ku asuntunan pedagógiko, didáktiko i di estudio.

Pa informashon por pasa personal na SIGE (Groot Davelaar 22-23) entre 8:00-12:00 i 14:00-17:00, yama na 738-6570, òf manda un e-mail na a.justiana@sige.cw/ m.ercicia@sige.cw.

Advertisements
error: Content is protected !!
%d bloggers like this: