Advertisements

Klaridat riba transporte eskolar

Klaridat riba transporte eskolar

Willemstad- Den kuadro di fasilitashon i pa garantisá ku tur mucha tin akseso na enseñansa, gobièrnu ya pa algun tempu ta brinda e servisio di transporte eskolar na muchanan entre 4 pa 16 aña.
Pa sigui fasilitá i kumpli ku su deber pa hasi enseñansa aksesibel pa un i tur, gobièrnu awor ta brinda e karchi di konvoi pa hóbennan di 17 aña+
E karchi aki ta duna hóbennan e oportunidat pa bai skol ku ABC transportbedrijf. Esaki no ta kompletamente nobo ya ku tabatin un grupo ku tabata trafiká kaba via di ABC transportbedrijf, ku tambe ta un kompania di Gobièrnu, esta un kompania di pueblo.
Delaster dianan tin diferente informashon den medionan di komunikashon ta sirkulá, tokante posibel kehonan relashoná ku Transporte públiko (ABC-busbedrijf).
Departamento di Transporte ku ta kai bou di Ministerio di Enseñansa, Siensia, Kultura i Deporte ta indiká ku te awor, a risibí solamente dos (2) keho di hóbennan ku ta trafiká ku transporte públiko (ABC-busbedrijf) i ku ta akudiendo aktualmente na Maria Immaculata Lyceum (ounke diferente hóben a firma e karta pa sosten).
Ta importante pa suprayá, ku ya gobièrnu a buska i ehekutá solushon pa e keho di e dos hóbennan aki ku ta kue konvoi den e área di banda bou. A pone konvoi ékstra i hasi adaptashon na e skema di orario di konvoi pa asina e hóbennan por yega skol na tempu.
Banda di esaki tin diferente keho ta drenta frekuentemente di mayornan i di alumnonan ku ta trafiká ku e transporte speshal pa skol (tantu bus chikitu komo e “Schoolbus”-nan), kaminda nan ta indiká ku e transporte ku Gobièrnu ta paga mas karu p’e (3x mas karu), na diferente okashon no ta bin buska nan, òf no ta buska nan na ora, i tampoko ta komuniká o informá ku nan no ta bini. E hóbennan ta keda para na e sitio ku mester buska nan pa hiba skol, te ora ku nan bai kas bèk. Of nan ta yega skol lat. E reto aki tambe gobièrnu ta tin atenshon pe.
Si tin mas keho, ta pidi mayornan pa por fabor entregá nan keho na Departamento di Transporte (Ministerio di Enseñansa, Siensia, Kultura i Deporte), situá na Bon Bini Business Center, Schottegatweg Oost 10
Advertisements
%d bloggers like this: