Advertisements

Estudio den Region: situashon aktual i maneho pa futuro

Na: Minister di Enseñansa, Siensia, kultura i Deporte
Señora Marilyn Alcala Walle

Schottegatweg Oost #10 (Bon Bini Business Center)

Presente

Djaweps, 25 di òktober  2018

Tópiko: Estudio den Region; situashon aktual i maneho pa futuro.

Apresiabel Minister Marilyn Alcala Walle,

Na komienso di aña eskolar 2018/2019 tabatin bastante preokupashon pa loke ta trata Estudio den Region. Tantu pa loke ta trata e grupo ku mester a kuminsá nan estudio i e grupo di studiante ku ya kaba a duna inisio na su estudio.

Den kuadro di esaki Parlamento a prepará dia 09 di òktober último pa interkambiá ku representantenan di e mayornan di  studiantenan, pero e reunion aki no a kontinuá. Debí na e echo ku e representante di e mayornan tabata den eksterior.

Apesar di esaki frakshon di PAR ta haña importante pa bin aklarashon pa loke ta trata Estudio den Region pa e aña eskolar 2018/2019 i e maneho pa futuro. Hasiendo uso di artíkulo 96 di Reglamentu di òrdu di Parlamento di Kòrsou, frakshon di Partido Alternativa Real lo kier hasi siguiente pregunta na Minister Alcala Walle:

 

  1. Minister Alcala Walle por informá Parlamento den kua temporada a kuminsá ku e preparashonnan pa Estudio den Region?
  2. Den kuadro di e preparashonnan Minister Alcala Walle por informá Parlamento kua ta e eksigensianan pa ku Estudio den Region?
  3. Den e preparashon pa ku Estudio den Region, a tene kuenta na kua skolnan e studiante nan ta registrá pa bai studia? Na final di e estudio, e diploma di e skol nan aki ta wòrdu rekonosé pa Kòrsou? Minister Alcala Walle por kompartí informashon si akaso e kondishonnan di sosten/guia di estudio, bibienda i finansa una bes den region ta faborabel pa nos studiantenan di Kòrsou?
  4. Por fasilitá Parlamento informashon tokante ki dia e promé grupo di studiante a bai?
  5. Kua ta e suma máksimo ku un studiante por haña na finansiamentu anualmente i pa su estudio total?
  6. Minister Alcala Walle por informá Parlamento si mayornan tin ku kontribuí na finansiamentu di estudio di e studiantenan?
  7. Minister Alcala Walle  lo por informá Parlamento si Gobièrnu Rhuggenaath lo kontinuá ku Estudio den Region? I si ta asina, bou di kua kondishon?

Atentamente,

Ana Maria Pauletta

Lider di Frakshon PAR

   

 

Advertisements
error: Content is protected !!
%d bloggers like this: