Advertisements

Engaño Presupuestario, trata sifra den Parlamento ku nos sa kaba ku ta kambia, Presidente di Parlamento,Trahando SIN PIA SIN KABES!

Engaño Presupuestario, trata sifra den Parlamento ku nos sa kaba ku ta kambia, Presidente di Parlamento,

Trahando SIN PIA SIN KABES!

Lei di Presupuesto 2019 no ta entregá den su vershon final pero ke kuminsá trata un konsepto ku a yega Parlamento ku ya tur hende sa ku lo kambia

 

Kòrsou, 25 di òktober 2018,

 

Kon por ta posibel ku Presidente Parlamento ta pone reunion pa tratamentu di  presupuesto 2019, dianan 29 i 30 di òktober, i despues dianan 1 i 2 di novèmber 2018, siendo ku Presidente a wòrdu informá kaba ku Gobièrnu lo kambia tur sifra presupuesto di 2019, den desèmber 2018.

Frakshon di MFK despues di a manda un karta pa Presidente di Parlamento, dia 22 di òktober último relashoná ku tratamentu di presupuesto 2019, kaminda Frakshon di MFK ta mustra ku no ta lógiko ku Parlamento por bai trata un lei di presupuesto di aña 2019 den un Komishon Sentral, miéntras tin indikashon ku esakinan lo kambia. Kontesta di sr. Millerson, Presidente di Parlamento tabata ku despues di un kombersashon ku Minister di Finansa a kontesta frakshon di MFK dia 23 di òktober ku nos tin rason den lokual nos a indiká den nos karta i a konfirmá lo siguiente;

  1. Lo tin un nota di kambio atrobe pa presupuesto 2018 despues di trese medidanan i ahustenan den sifra i maneho, i esaki lo drenta na Parlamento medio novèmber 2018, ku e konsehonan nesesario di “Raad van Advies”.
  2. Lo tin un nota di kambio tambe riba presupuesto 2019 ku lo tin ku bin bek Parlamento ku su konsehonan nesesario di Raad van Advies apénas desèmber 2018, dokumento ku a drenta na 11 di sèptèmber último lo kambia por kompleto despues di trese medidanan i ahustenan den sifra i maneho.

Komunikando esaki na frakshon di MFK, Presidente di Parlamento ta informá ku e proyekto di lei finansiero di aña 2019, lo drenta adaptá, den luna di desèmber 2018.

Un akshon inkomprendibel pa bai trata un lei entregá den un vershon, pero ku ta bai kambia den su totalidat pa motibu di kambionan di sifranan i ahustenan i lo yega adaptá den desèmber Parlamento. Ku esaki realmente ta demostrá kon ta engañá sosiedat ora nos ta bai hasi pregunta i debatí riba un lei di sifra di presupuesto 2019 siendo ku esaki no ta e vershon final.

Nos no lo por partisipá na e Engaño Presupuestario, pueblo ta tende nos puntra preguntanan riba sifranan ku nos sa kaba ku na Desèmber 2018 apénas Gobièrnu lo entregá Parlamento den su vershon final. Ningun Frakshon den Parlamento ku sa lesa i ta komprondé Presupuesto i su proseso no por pèrdè su tempu aprobando òf kuminsá trata un lei ku no ta e produkto final esaki ta un maneho desastroso, SIN PIA SIN KABES di Presidente di Parlamento i di koalishon forma pa PAR-MAN-PIN, ku konstantemente ta violando lei i reglanan.

Gerrit Schotte

Na nòmber di Frakshon di MFK

Kòrsou, 25 di òktober 2018,

Advertisements
%d bloggers like this: