Advertisements

Cft: Medida konkreto ta nesesario pa logra rekuperashon finansiero Vários reto riba kaminda pa evitá ku posishon di debe ta bira muchu haltu

Cft: Medida konkreto ta nesesario pa logra rekuperashon finansiero

Vários reto riba kaminda pa evitá ku posishon di debe ta bira muchu haltu

 

Philipsburg – Sint Maarten resientemente a presentá e Plan di Rekuperashon Finansiero (Financial Recovery Plan). Segun e plan ei entrante 2021 lo realisá surplusnan presupuestario pa medio di oumento di entrada. Kolegio di supervishon finansiero Kòrsou i Sint Maarten a hasi un yamada na Sint Maarten pa tuma medida konkreto, pa di e forma ei e surplusnan planeá berdaderamente keda realisá. Mirando ku e maneho finansiero aktualmente ta insufisiente, Cft a hasi un palabrashon ku Sint Maarten ku lo traha pa yega na un deklarashon aprobatorio di akountent pa e kuenta anual di 2021.

Sint Maarten a presentá e Financial Recovery Plan riba 10 di òktober. Pa medio di rekuperashon di ekonomia, redukshon di gastu i restrukturashon di e servisio di impuesto, Sint Maarten ta spera di por realisá surplus presupuestario struktural, kuminsando na aña 2021. Presidente di Cft Raymond Gradus: “Medidanan pa redusí gastu i mehorá kumplimentu ku deber di impuesto ta di vital importansia pa por realisá un presupuesto balansá. Banda di esaki maneho finansiero sólido ta forma e base pa yega na sifra konfiabel i na tempu. E plan di restrukturashon aki ta kontené bon elemento i nos a hasi un yamada na Konseho di Minister i Parlamento pa introdusí medida konkreto pa e aspektonan aki.” Un ehèmpel ta aprobashon di e lei nobo di penshun, kual miéntras tantu a keda entregá na Parlamento pa tratamentu.

Sint Maarten ta premirá ku e presupuesto lo tin défisit den e añanan benidero. E défisit premirá pa 2018 a keda ahustá  te ANG 144 mion. E konsepto di presupuesto 2019 ta sera ku un défisit di ANG 88 mion. Komo konsekuensia di esaki, Sint Maarten ta keda dependé di fiansanan pa sosten di likides, loke lo resultá den subida di e kuota di debe. Pa e motibu aki Cft a konsehá pa mantené un aktitut reservá ora ta konsiderá pa tuma otro fiansa. Presidente di Cft Raymond Gradus: “Pa finansiamentu di proyektonan di rekonstrukshon, ta mihó Sint Maarten usa e trustfund, kual ta destiná hustamente pa e meta ei.”

Otro punto ku tabata haltu riba e agènda, ta kumplimentu ku e puntonan di e instrukshon ku Konseho di Minister di Reino a duna na 2015. Esaki tin komo konsekuensia ku Sint Maarten mester kompensá e défisitnan di e periodo 2010 te ku 2014, kita e retraso den pagonan i tuma medida pa por tene e penshun di behes i e sistema di kuido strukturalmente pagabel. Diferente deadline a vense òf lo vense pa fin di e aña aki. A tene Cft al tanto di e progreso hasí, den diferente kombersashon. Por parte, pa motibu di e efektonan di orkan Irma, Sint Maarten no ta den posishon pa e por kumpli ku tur e puntonan di e instrukshon pa fin di e aña aki. Sint Maarten lo raportá tokante di e progreso i hasi un petishon serka Konseho di Minister di Reino pa establesé deadline nobo pa e puntonan di e instrukshon ku no  keda lográ pa fin di e aña aki. Cft a pidi atenshon pa e medidanan pa redusí e défisitnan den e sistema di kuido.

Atrobe a pidi atenshon pa e mal estado di e maneho finansiero. Sin un maneho finansiero sólido un proseso presupuestario ordená no ta posibel. E prueba (real) ta ora aprobá na tempu un kuenta anual ku un deklarashon aprobatorio di akountent. A keda palabrá ku e gobièrnu di Sint Maarten ta garantisá ku esaki lo ta e kaso ku e kuenta anual di 2021, i Cft ku apresio a tuma nota di e promesa aki. Tambe a pasa palabra ku lo entregá e kuentanan anual di 2016 i 2017 e aña aki ainda. Por spera ku aprobashon di e kuentanan anual di 2013, 2014 en 2015 tuma lugá den e simannan benidero.

Durante di su bishita Cft a hiba kòmbersashon ku Gobernador, Konseho di Minister, Minister di Finansa, Minister di Salubridat, Asuntunan Sosial i Labor, e komishon finansiero di Parlamento, representantenan di World Bank, Prinses Juliana International Airport i Fondo General di Penshun Sint Maarten. Esaki tabata e promé bishita di e miembronan nobo di Cft Henk Kamp riba proposishon di Hulanda i Russell Voges riba proposishon di Sint Maarten. E otro miembronan ku ta forma parti di e Kolegio ta presidente Raymond Gradus i Gregory Damoen riba proposishon di Kòrsou.

 

Advertisements
%d bloggers like this: