Advertisements

Kuido di nos animalnan ta nos tur su responsabilidat

Kuido di nos animalnan ta nos tur su responsabilidat

Areanan di Shut, di Kleinhofje i Playa kanoa a bira ´dumpplaats´regular pa un kantidat di bestia bibu i morto. Ta dùmp awa sushi den laman, kousando daño na piska i otro animalnan den laman. Tin kontrabanda di makaku, kolebra i otro animalnan eksótiko sin ku tin e kuido nesesario.Diariamente ta tuma nota di kaso nan di maltrato di bestia.  

Apesar di e trabou di konsientisashon ku diferente fundashon ta realisá,  e sifranan di maltrato i abandono di bestia ta subiendo drástikamente. E pregunta ta lanta kon e echo kruel aki por sosodé den un sosiedat desaroyá. Mahatma Ghandi: Grandesa di un nashon ta wòrdu midi na kon e siudadano nan ta trata bestianan.

Frakshon di PAR kier para ketu na e konsientisashon di nos pueblo riba e nifikashon di subida di maltrato i abandono di bestia den nos komunidat. Kiko esaki ta bisa di kon nos ta pensa tokante animal, pero tambe nos naturalesa i medio ambiente?. Ku na momento ku no por hasi uso di dje mas, nos por deskartá esaki sin tene kuenta ku e konsekuensianan?.

Kuido di kachó, pushi, para, kabai, buriku, piska, yuana, lagadishi, animalnan eksótiko i tur otro animal ta responsabilidat di nos tur. Komo Parlamentario nos ta bos di esun ku por papia i tambe di esnan ku no por papia. Den kuadro di esaki frakshon di PAR lo pidi un reunion di Parlamento ku e tema di abuso di animal i lo invitá tur partner stratégiko, fundashon ku ta traha den bienestar di animal i minister enkargá. Di e forma aki di un forma públiko por atendé ku e tema aki i yega na palabrashonnan konkreto.

Ban uni kontra di tur tipo di abuso, den kaso di abusu di hende, bestia i di nos naturalesa ta e petishon di lider di frakshon di PAR, sra. Ana Maria Pauletta

Advertisements
%d bloggers like this: